Laavâ mield räjikosáttâh uážžu jorgettiđ ulmuid Suomâ raajijn já joba meddâlistiđ ulmuid Suomâst. Meid torvosajeucâmušâi koskâlduttem teikkâ tai vuástáväldihánnáá kyeđđim lii loválâš uđđâ laavâ vuáđuld. Ovdil jorgettemlaavâ jyehi torvosajeucâmuš koolgâi kieđâvuššuđ.
Syeinimáánu 12. peeivi ovdâskode aalmugovdâsteijeeh jienâstii jorgettemlaavâ tuhhitmist. Laavâ peeleest jienâstii 167 aalmugovdâsteijed, já ton vuástá jienâstii 31 aalmugovdâsteijed. Ohtâ aalmugovdâsteijee lâi meddâl já ij jienâstâm ollágin. Kokoomus, Vuáđusyemmiliih, Kuávdáš, Ristâliih sehe stuárráámus uási Sosiaaldemokraatijn já Ruátálijn jienâstii laavâ peeleest. Meid Harry Harkimo já Timo Vornanen jienâstáin jorgettemlaavâ peeleest. Laavâ vuástá jienâstii Ruánááh, Čižetlitto, Eva Biaudet (ruát.) já kuttâ Sosiaaldemokraatáid kullee aalmugovdâsteijee.
Suomâ uáiviminister Petteri Orpo (kok.) muštâlij, et Ruoššâeennâm kiävttá siirdolijd vyehhin vaiguttiđ Suomân, mii lii ohtâ suijâ, mondiet laahâ vuáđudui. ”Suomâ huolât jieijâs torvolâšvuođâst, já mij huolâttep EU räjitorvolâšvuođâst”, Orpo eeđâi.
Ruánái europarlamentarikkár Ville Niinistö mielâst uđđâ laahâ movtijdit Ruoššâeennâm keččâliđ laavâ toimâm.
Suomâ já Ruoššâeennâm ohtâsâš rääji piso kuittâg kiddâ vala mottoom ääigi. ”Nuorttârääji lehâstem ij lah tääl äigikyevdilis fáddá”, muštâl Heikki Autto (kok.) Yle sahhiittâlmist. Autto meid tuáivu, et laavâ ij kuássin taarbâš kevttiđ, veikkâ sun jienâstij-uv laavâ peeleest.
Aanaar-uv lii räjikieldâ. Nuorttârääji puáhtá rastaldittiđ Räji-Joovsepist, suullân 50 kilomeetterid Avelist nuortâs. Räji-Joovsepist-uv lijjii siirdolâščuolmah moonnâm ive loopâst, mon suujâst puoh rääjirastaldittemsajeh piäijojii kiddâ.
Käldeeh:
– Eduskunta hyväksyi käännytyslain, pääministeri Orpo: ”viesti Venäjälle on vahva” (yle.fi)
– Lue tästä, mitä uusi käännytyslaki muuttaa käytännössä (yle.fi)
– Puolueiden puheenjohtajat kommentoivat käännytyslakia – Andersson: ”Surullinen päivä” (yle.fi)
– Käännytyslaki hyväksyttiin historiallisen tiukassa äänestyksessä – Orpo: Suomi on yhä oikeusvaltio (www.hs.fi)
Kove: Fanni Uusitalo, valtioneuvoston kanslia