Taan ive jyelgipáálu almai euroopmiäštárkištoi fiinaal spellui syeinimáánu 14. peeivi Berlin olympiastadionist 65 000 keččee oovdâst. Keččei juávhust láin eres lasseen Ovtâstum kunâgâskode uáiviminister Sir Keim Starmer já prinssâ William. Spellâ aalgij tijme 22.00. Speelâ váldutuámárin tooimâi ranskalâš François Letexier, já suu iššeen lijjii maaŋgah išetuámáreh.
Espanja haldâšij speelâ aalgâ, mutâ ij moonnâm kuhháá ovdilgo Eŋland peesâi meid fáárun speelân. Vuosmuu uásist ij tábáhtum ennuv. Tuše muáddi volliittemirâttâs kuábbáá-uv juávkun. Nube uásist vist kuábbáá-uv juávhust lijjii maaŋgah irâttâsah já máhđulâšvuođah čievčâstiđ moolâ, mutâ vuosmužžân tast luhostui espanjalâš Nico Williams. Lamine Yamal čievčâstij páálu Williamsân, kote sesâlistij volliittem päčimáin moolâ. Yamal já Williams lává kuohtuuh nuorâ, jotelis já teknisiih volliitteijeeh, kiäh lává lamaš Espanja volliittemspeelâ velttâkoortah ubâ kištoi ääigi.
Čuávuvâš merhâšittee tábáhtus speelâst lâi talle ko eŋlandlâš Cole Palmer, kote lâi eidu lavkkim kiedi oolâ, paajij moolâ 73. minuttist. Moolâ lâi muččâd, já tot adelij motivaatio já tuáivu sehe Eŋland spelleid já sii kyeditteijeid. Moolâ maŋa Eŋland uážui ennuv moovtâ pálustâlmân, já mottoom kooskâst Eŋland haldâšij-uv speelâ. Speelâ majemui minuttij ääigi Espanja kuittâg taistâlij maasâd. Espanjalâš Mikel Oyarzabal skuvgááttij päjistiđ vuáittumoolâ 86. minuttist. Eŋland peesâi vala ohtii pyere volliitmân, mon Espanja moolâvahtâ Unai Simón já volliitteijee Dani Olmo kuittâg piäluštáin.
Spellâ nuuvâi Espanja vuáitun. Espanja spelleeh loptejii jo niäljád Euro-pookaal staatâs historjást. Mihheen eres staatâid ij lah vuáittám jyelgipáálu almai euroopmiäštárkištoid neljii. Kištoi pyeremus spellen väljejui Espanja koskâkieddispellee Rodri.
Finalân peessâm lâi kuábbáá-uv juávkun ilolâš äšši, mut eromâšávt Eŋland kyeditteijeid Eŋland miänástus kištoin lâi tehálâš. Eŋland ryevdirađejotoluvâst lijjii tuođâliih vädisvuođah pasepeivieehid, čaalij Daily Mail. Stuorrâ uási junái pargovievâst piettâlii paijeelääigipargoi porgâmist, vâi sij pesâččii keččâđ speelâ. Daily Mail mield maaŋgâi ryevdirađepargei pargosopâmušâin ij vattuu pasepeeivi porgâm, já ryevdirađefinnoduvah lyettih toos, et pargeeh pargeh pasepeeivi lasepäälhi tiet.
Jyelgipáálu almai euroopmiäštárkištoh láá spellum ive 1960 rääjist. Vuosmuid kištoid vuoitij Sovjetlitto. Tast maŋa kištoh láá uárnejum jyehi niäljád ive, ađai taan ive kištoh lijjii 16. jyelgipáálu almai euroopmiäštárkištoh. Kištoi uárnejeijen tuáimá UEFA ađai Euroop jyelgipállulitto.
Čuávuvááh jyelgipáálu almai euroopmiäštárkištoh uárnejuvvojeh neelji ive keččin. UEFA almottij, et ive 2028 kištoh spiällojeh Ovtâstum kunâgâskoddeest já Irlandist.
Käldeeh:
– Kisauutiset (yle.fi)
– Spain vs England timeline (www.uefa.com)
– The best of EURO (www.uefa.com)
Kove: Rebecca Leisten (Wikimedia Commons)