Anarâškielâ servi tiävdá 40 ihheed. Servi juhlo šoddâmpeivive kyevti peeivi ääigi. Skammâmáánu 21. peeivi uárnejuvvoo kielâseminaar, já skammâmáánu 24. peeivi vist tuálloo seervi váldujuhle. Luuvâ vuoluubeln lasetiäđuid juhleest já ohjelmist.
Seervi váldujuuhlán lii munealmottâttâm purâdem orniistâllâm tiet. Toh, kiäh halijdeh purâdiđ, kalgeh mäksiđ 10 euro máávsu purrâmušâst. Vuálá 15‑ahasiih peesih purâdiđ nuuvtá.
Munealmottâttâm lii čannee. Taat meerhâš tom, et servi tiiláá purrâmuš tiätu mere munealmottâtmij mield, adai juhlepeeivi ij innig pyevti almottâttâđ puurâdmân.
Purrâmušmáksu máksoo seervi tilin. Mäksimtiäđuh kávnojeh almottâttâmluámáttuvâst.
Almottât seervi váldujuuhlán vuoluubeln leijee QR‑koodi tâi puálu peht majemustáá 15.11.2026 tijme 23.59.
Jis tust láá koččâmušah, te tun puávtáh väldiđ ohtâvuođâ seervi čällei: callee@anaraskielaservi.fi.
Anarâškielâ kielâseminaar lávvárduv 21.11.
Anarâškielâ seervi tutkâmjuávkku uárnee kielâseminaar lávvárduv 21.11. tijme 10–16 Sajosist Soljust. Ohjelm lii kyevtuáság.
Iđedispeeivi ääigi uásálisteeh peesih uápásmuđ kielâ iäláskitmân. Juurdân lii čokkâniđ smiettâđ, moin naalijn anarâškielâ kolgâččij ain iäláskittiđ čuávuvái 40 ive ääigi. Juurdân lii huksiđ máhđulijd puátteevuođâpálgáid uásálistei tuoivui já vyerdimist leijee puátusij peht. Ehidispeeivi ääigi seminaarist oovdânpuáhtojeh seervist tääl joođoost leijee kielâprojekteh.
Filosofia maister Fabrizio Brecciaroli oovdânpuáhtá Samionary-sänikirjeproojeekt, mii lii Interreg Aurora ‑ruttâdmáin joođoost. Projektist láá fáárust anarâš- já ummeesämikielâ. Taan projektist anarâškielâ säänih finnejeh tievâslii sujâttemmyensteris sänikirjeortografiain. Fabrizio čáittá uásálisteid, maht sij pyehtih kevttiđ Samionary. Juurdân lii taan proojeekt vuáđuld rähtiđ anarâškielâ sujâttemoopâ, mast uáiná, maht já mondiet säänih sojeh tego toh sojeh. Anarâškieláin Fabrizio Brecciaroli lasseen projektist parga ohjelmistee Pauli Rämö.
Nubben ehidispeeivi ohjelmin lii Nettidigisäänih-sänikirje oovdânpyehtim já ton pyeredemtáárbuh. Nettidigisäänih-sänikirje lii tääl piäiválii kiävtust anarâškielâ kielâkevttimist, mut taan sänikirjeest láá vala vááijuvvuođah. Taam uási stivriv anarâškielâ dooseent Marja-Liisa Olthuis já Taažâ arktisii ollâopâttuv kielâteknologia professor Trond Trosterud.
Seminaarist tuáimá sänikirjeuási ohtâvuođâst meid sänikliiniik. Kevtteeh pyehtih koijâdiđ já tuđhâdiđ saanijd já toi merhâšuumijd.
Seminaar lii uásálisteid nuuvtá. Seminaarân uárnejuvvoo meid káidusohtâvuotâ, mut sänikirjeuási teknisii uási tiet pyereeb lii uásálistiđ seminaarân pääihi alne. Jis áigu uásálistiđ káidusohtâvuođáin, te kalga almottâttâđ muuneeld seervi čällei: callee@anaraskielaservi.fi.
Anarâškielâ servi fáálá uásálisteid iiđeed- já peivikäähvi já njälmipitá.
Seervi váldujuhle majebaargâ 24.11.
Anarâškielâ seervi váldujuhle tuálloo Sajosist majebaargâ 24.11.2026 tijme 14.30–20.
Párnáijuhle
Váldujuhle álgá párnái juhlijgijn. Párnáid uárnejuvvoo ohjelm tijme 14.30–16.30. Taam uási stivriv Heli Huovinen já Ulpu Mattus-Kumpunen.
Vyerdimist lii oovtâst spellâm, luuhâm já muusikpuddâ. Servi fáálá párnáid sääpi já njälmipitá ovdil ohjelm.
Váldujuhle
Váldujuhle uárnejuvvoo Saijoos auditoriost tijme 16.30–20. Váldujuuhlán kalgeh puohah almottâttâđ muuneeld.
Ohjelm
- Tiervâpuáttimsäneh já tiervâpuáttimciärháš: Saavâjođetteijee, värisaavâjođetteijee já čällee
- Uđđâ kirjij almostittem:
- Valtteri Valkeapolku (toim.): Mainâsij ihe – Ijâttes ijjâ. Párnáimainâsantologia nubbe uási
- André Kuipers: Puohvuođâ atlas. Jurgâlus: Sofia Olthuis
- Maccâm ihán 1986: Seervi vuáđudem: vuosmuš saavâjođetteijee Matti Morottaja, vuosmuš stivrâ
- Paaneel: vuosmuš já tááláš stivrâ; lávvárduv kielâseminaar iäláskittemtuoivuuh siärván
- Konsert: Ráppám já livđum: Amoc já Anna Morottaja
- Purâdem: Määli, leibi já kákkukäähvi / ‑teejâ
- Rijjâ savâstâllâm
- Vyebdimpevdi: Kirjemarkkâneh já anarâškielâg tiŋgij vyebdim seervi tooimâ pyerrin
Kove: Fabrizio Brecciaroli, Valtteri Valkeapolku