Helsigist ässee sämmilij taaiđâ já vuáttámušah láá uáinusist Helsig kaavpugmuseo já Kulttuurkuávdáš Caisa uđđâ čáitálduvâin. Toh láá uási Helsig kaavpug ohjelmubâlâšvuođâst, mon ulmen lii, ete jieškote-uvlágáneh helsigliih pyehtih jiejah vaiguttiđ toos, maht sii kulttuur, fiäráneh já mainâseh muštâluvvojeh.
Sämmilâšvuotâ uáinoo Helsigist maaŋgânáál. Ovtâstittee ääših láá noonâ madduuh suuváid, sämikieláid já sämikulttuuráid, mut kaavpugist elimân lohtâseh meid koččâmušah identiteetist já ton huksiimist sehe jieijâs maddui siäilutmist.
Helsig kaavpugmuseo oovdânpuáhtá sämieellim Helsigist
Skammâmáánu 6. peeivi Helsig kaavpugmuseost lekkâs čáitáldâh Yhteinen kylä ’ohtsâš sijdâ’, mii muštâl sämmilij elimist tááláá ääigi Helsigist. Čáitálduv amnâstuvâid láá pyevtittâm, valjim já asâttâm čáittusân Helsigist ässee sämmiliih.
Kuraattorjuávkun kuleh Aimo Aikio, Laura Feodoroff, Helmi Hagelin já Mari Gauriloff. Čáitálduv arkkitehtin poorgâi Eveliina Sarapää já graafisâžžân sundáttellen Lotta Hagelin. Čuovâkovetaaidâr Marja Helander lii kuvvim helsiglii sämmilâšvuođâ maaŋgâmuđusâšvuođâ.
Ovdil čáitálduv uárnejui dokumentistemproojeekt, mast sämmiliih jiejah miäruštâllii, maggaar amnâstâh vyerkkejuvvoo kaavpug ohtâsii muušton. Dokumentistmist pajanii eereeb iärrás maaŋgâpáikkásâšvuotâ, tárbu kielâ já kulttuur sirdemân já paijeentolâmân sehe tárbu toimâđ ohtsâškoddeest tai aašij oovdedmân. Čáitálduvâst kieđâvuššojeh meiddei kaavpugsämmilâš identiteet, argâ já juhle sehe sämmilij historjá Helsig kuávlust.
– Sämmilij vuoigâdvuotâ meridiđ olssis kyeskee aašijn lii čallum Suomâ vuáđulaahân, mut totkin ij ain täähid tom, ete návt tábáhtuuččij. Taan projektist ovdâsvástádâs siskáldâsâst já olášutmist lii lamaš sämmilijn. Museo roolân lii lamaš tuárjuđ mii tain ulmijn. Taat lii pälgisliäkkoo toimâvyehi museohistorjást, já mij tuáivup, ete tot leevvân vijđásuubon, Mari Gauriloff muštâl.
– Maaŋgâmuđusâšvuođâ oovdedmist ij lah koččâmuš tast, magarijd siskáldâsâid mij pyevtittep, peic meid tast, maht toh pyevtittuvvojeh. Sämiohtsâšpargo iššeed mii ovdediđ toimâvuovijd, main siärvus jieijâs jienâ, äššitubdâmuš já uáinuh láá fáárust aalgâ rääjist, iätá kulttuurpalvâlusâi eromâšsundáttellee Elisa Sarpo.
Yhteinen kylä ‑čáitáldâh lii áávus 6.11.2026–25.3.2027. Tot lii nuuvtá.
Sämmilâš tááláštaaiđâ Kulttuurkuávdáš Caisast
Kulttuurkuávdáš Caisast lekkâs roovvâdmáánu 30. peeivi Kirsi M. Paltto já Jouni S. Laiti čáitáldâh Litnát, lahka – Lempeästi, lujasti. Tot kieđâvuš soro, kieresvuođâ, rähisvuođâ já ulguupiälásâšvuođâ sullâsijd maailmvijđosijd fiäránijd.
Taidârkyevtis, kiäh aassâv Inarist já lává meddâl Ucjuuvâst, lává ráhtám tiletuojijd já páccáid, moi vuáđđun láá sämityeje tekniikeh já materiaaleh. Suoi ovtâstiteh tuojijnis eereeb iärrás päähi, muorâ já čuárvi uulon, tekstiilân, ruástum stáálán já eres ráhtulâšvuođâláid materiaaláid.
Čáitáldâh lii áávus 30.10.–28.11. Tot lii nuuvtá.
Sämikulttuur konsertlaavdij alne
Helsig Savoy-teatterist uárnejuvvoo skammâmáánu 6. peeivi Giitu – Kiitos ‑konsert, mii lii siämmást Yhteinen kylä ‑čáitálduv lekkâmkonsert. Konsertân kulá Ulla Pirttijärvi, taažâ Áššu já helsiglii Ilma Vocal Ensemble uđđâ muusiktyeje vuosâčááitus. Tábáhtusân kalga uástiđ liipu.
Sämimuusik kulloo meid Helsig kaavpugorkester ohjelmist. Uđđâivemáánu 22. peeivi Helsig Muusiktáálust uárnejuvvoo Kohtaamisia-klubi, mon kyessin puátá Ánnámáret ađai Anna Näkkäläjärvi-Länsman. Tábáhtusân piäsá nuuvtá.
Käldee: Helsig kaavpugmuseo tiäđáttâs
Kove: Marja Helander / Helsig kaavpugmuseo