Haldâttâs lii sooppâm tooimâin, moiguin tot västid puáldámušamnâsij hoodij paijaanmân. Pirâs- já šoŋŋâdâhminister Sari Multala (kok.) muštâlij ääšist onne toimâtteijeid ovdâskoddeest.
Toorjâpakkeet lii ohtsis 60 miljovn eurod. Tast 30 miljovnid kiävttojeh jođettemsyergi já eennâm- já meccituálusyergi puáldámušamnâstorjuid.
Fiävruviäru kepiduvvoo 30 miljovnáin euroin. Tooleeb lâi soppum, ete tot kepiduuččij 10 miljovnáin euroin. Pargomätkikolokeeppidmij pajerääji paijaanmân lii väridum 10 miljovn eurod.
Multala mieđeet, ete tooimâin ij lah stuorrâ merhâšume toos, maid aalmugjesâneh mäksih puáldámušamnâsijn bensinsajattuvâin.
– Mij ep suite čuođij miljovnij viärukeeppidmáid, Multala iätá.
Multala mield haldâttâs halijdij kavnâđ toorjâtooimâi ruttâdem budjetist leijee käržis vääri siste. Ruttâ toorjâtoimáid valdui kiäinuviärmáduv vuáđutipšomân sehe ráhtulâšvuođâ čiđđâdioksidluáštádâsâi čonâmân väridum ruuđâin.
Vuáđusyemmiliih liččii halijdâm kepidiđ puáldámušamnâsij jyehimkenigâšvuođâ, mut tot ij peessâm fáárun toorjâpakettân. Jyehimkenigâsvuotâ uáivild tom, ete tiätu uási puáldámušamnâsij juovâdeijei jyehim puáldámušamnâsijn kalga leđe uđâsmuvvee. Ton ulmen lii kepidiđ fossiillij puáldámušamnâsij kevttim ubâ EU:st.
Käldee:
– Hallitus viimein sopuun bensapaketista – PS:n Mäkelä: Pääministerin kasvot täytyi pelastaa (yle.fi)
Kove: Lauri Heikkinen / staatârääđi kanslia (CC BY 4.0)