Tiervâsvuođâ já pyereestvaijeem lágádâs THL almostitij cuáŋuimáánu 23. peeivi čuávdusiävtuttâsâs čuávuváá haldâttâs ohjelmân. Iävtuttâsah láá ohtsis käävci, já toi ulmen lii nanodiđ ulmui jiegâlii killeelvuođâ kriisâtiileest.
THL mield tast išedeh luáttámuš puátteeááigán, pyeri fyysilâš já psyykkilâš tiervâsvuotâ, sosiaallâš pyereestvaijeem sehe tuáimee ohtsâškodde.
– Syemmilij luáttámuš puátteeááigán keččâlâddoo iberdetteht tááláá ääigi. Lii uáli jo tehálâš, ete mij liijká tuostâp lyettiđ toos, ete mij cevzip kriisâin. Mij rävisulmuuh kolgâp pissoođ toimânavcâlâžžân já siämmást visásmittiđ torvolii aargâ párnáid já nuoráid, iätá THL uáivihovdâ Mika Salminen.
THL iävtuttâsah uánihávt
1. Ubâlâštorvolâšvuotâ puárrán lasseetmáin tiäđu já ibárdâs jiegâlii killeelvuođâst kriisâtiilijn.
THL iävtut ovdâmerkkân aalmug jiegâlii killeelvuođâ merikoskâsii árvuštâllâm sehe mielâtiervâsvuotâ- já viärdásâštoorjâpalvâlusâi finnim pyeredem.
2. Nuorâi luáttámuš puátteeááigán lassaan uđđâ Juáháš nuorâ ‑ohjelmáin.
Ohjelm pištáččij love ihheed, já ton ulmen ličij eereeb iärrás kepidiđ ohtuuvuođâ, estiđ uáivádittee amnâsij kiävtu algâttem sehe nanodiđ torvolâšvuođâ aargâst já Internetist.
3. Argâpeeivi torvo naanoosm toin naalijn, ete viehâvääldi estim já párnáisuojâlem ráhtuseh já ovdâsvástádâsah tahhojeh čielgâsubbon.
4. Ohtsâškodáliih miärádâsah išedeh ulmuid toohâđ tagarijd kilelis valjiimijd, moh ovdedeh tiervâsvuođâ.
THL iävtut purrâmušveerkij tiervâsvuotân vuáđuduvvee viäru, epitiervâslij purrâmušveerkij markkânistem raijim sehe 18 ive aherääji pieijâm energiajuhâmušâi vyebdimân.
5. Aalmugpuácuvuođâi koloh kiäppáneh Tiervâsvuotâ luándust ‑ohjelmáin.
Ohjelm pieijui joton taaijuv, já tot pištá love ihheed. Ton ulmen lii anneeđ luándu ävkkin ulmui tiervâsvuođâ oovdedmist já puácuvuođâi estimist.
6. Pyereestvaijeemkuávlui estee já ovdedeijee pargo piähtoo ko ruttâdemmyensterist tahhoo movtijditteb.
7. Soti-vuáhádâh ovdeduvvoo kuhesáigásijn parlamentaarlijn ohtsâšpargoin, mii vuáđuduvá äššitobdei árvoid já tutkum tiätun.
8. Nuorâi uáivádittee amnâsij kiävtu estim já meid torjuu já tipšo jotkuuvâšvuotâ puáráneh kuávlulij palvâlusâiguin.
– Mij faallâp puáttee haldâttâsân koŋkreetlijd, tutkum tiätun já jieččân äššitubdâmušân vuáđuduvvee čuávdusijd, moiguin mij pastep västidiđ taan maaŋgâkriisâlii ääigi pyereestvaijeem já tiervâsvuođâ kuávdáš čuolmáid. Tiäđust-uv tááláš-uv haldâttâs lii tiervâpuáttám porgâškyettiđ, Salminen iätá.
Čuávdusiävtuttâssáid piäsá uápásmuđ tärhibeht (suomâkielân) THL olgosadalduvâst.
Käldee:
– THL julkaisi hallitusohjelmaratkaisunsa – tavoitteena vahvistaa ihmisten henkistä kriisinkestävyyttä ja luottamusta tulevaisuuteen (thl.fi)
Kove: StockSnap (Pixabay)