Ko Laapist kuáđđojeh roskeh luándun, te maŋgii lii riskâ tast, et poccuuh sorrojeh toid. Sarva monâttem eromâšávt čohčuv lii stuorrâ monâttâs puásuituállei.
Mudusjäävri palgâs puásui-iššeed Osmo Seurujärvi muštâl Ylen, et sun kávná jyehi ive aainâs-uv mottoom poccuu, mii lii surrum ulmui kyeđđim ruskijd. Návt keevâi taan čoovčâ suu párnáá oovtâ poccui. Poccuu koolgâi koddeđ, tastko tot ij innig tuoibâm tábáhtus maŋa.
Vuoigâdvuotâtiettuu tuáhtár Sampo Mielityinen muštâl Ylen, et pasâttâslaahâ lii toin naalijn oovtkiärdán, et luándun ij uážu kyeđđiđ ruuskijd ige maiden ereskin tävirijd, moh sättih vahâgittiđ elleid.
Mielityisii mield huolâmettumvuođâst lii stuorrâ merhâšume talle, ko tulkkojuvvoo laahâ vaahâg sajanmäksimist. Mielityinen muštâl, et huolâmettumvuotâ puáhtá leđe ovdâmerkkân tot, ete kuáđá viermijd kuškâđ vuovvijn, mii čielgâsávt spiekâst táválii vyevist. Tággáár tábáhtusâst viermij omâsteijee tuođânálásávt ferttiiččij sajanmäksiđ monâttum poccuu puásuituállei, Mielityinen iätá.
Palgâsij seervi toimâjođetteijee Hanna Nurmi iätá Ylen, et ulmuid kolgâččij čuovviđ lase, vâi sij joskâččii kyeđimist ruuskijd luándun. Sun iätá meiddei, et ulmuid kolgâččij muštâliđ, maid porgâđ, jis sij uáinih ruskijd surrum ellee. Nurmi ana kuittâg pyerrin äššin, et tágárijn tábáhtusâin almottuvvoo meiddei palgâsij siärván.
Käldee:
– Useat porot kuolevat vuosittain ihmisten luontoon jättämiin roskiin (yle.fi)
Kove: Alexandre Buisse (CC BY-SA 3.0 / Wikimedia Commons)