Anarâš aavis: Rotterdam Ahoy-areena, roovvâdmáánu 19. peeivi 2026.
Taanihásiih steelligvalastâllâm maailmmiäštárkištoh Rotterdamist Ahoy-areenast láá faallâm eromâš puorijd puátusijd, jiäráskittee puudâid já eromâš fiijnâ siärvuslii valastâllâmjiegâ. Anarâš aavis eelij apsemin kištovuoiŋâ nisonij karssâmkištoi ääigi roovvâdmáánu 19. peeivi. Taan peeivi kiišton čahhii maailm njunošnoomah, noonâ juávkkuoovdânpyehtimeh já meid olâttettee pettâšumeh.
Kaia Tanskanen uulij kyelbi karssâmijn käävcinubálovádin
Syemmilii uáinust kišto mielâkiddiivumos nommâ lâi Kaia Tanskanen. Sun čokkij nisonij neljikámppádâlmij karssâmijn ohtsis 50,966 čyegisid. Tanskanen luhostui pyeremustáá kyelbist. Sun finnij ohjelmstis 13,100 čyegisid já uulij eromâš korrâ kyelbikištoost käävcinubálovádin ige lam čuággái tááhust nuuvtkin kukken taan steellig fiinaalsaajeest, moos čahhii käävcis. Kyelbi karssâm vuoitij Ovtâstum staatâi Reese Esponda čuággáigijn 13,633.
Kyelbi lii steellig, mast tarbâšuvvoo akrobatia, vyeimi já muusikân heiviittum njyebžilis lihâdem. Vädis lihâstâssarjij lasseen árvuštâlmist tiäduttuvvojeh meid oovdânpyehtim putesvuotâ já vuálospuátimij haldâšem.
Tanskasiist láá kyehti aalmuglâšvuođâ. Sun puávtáččij uásálistiđ kištoid meid Ovtâstum staatâi ovdâsteijen, mut sun liijká – eenis ravvui mield – lii valjim Suomâ.
Olympiajotteeh lijjii kievrah meid Rotterdamist
Brasilialâš Rebeca Andrade lii ohtâ steelligvuáimáštâllâm kirkkâdumosijn taasnijn. Suu árvukištoost piergiimeh já teknisávt hästee oovdânpyehtimeh taheh sust valastâllee, kiäm keččeeh já kištoareenah čuávuh eromâš tárkká. Nuuvt keevâi meid Rotterdamist. Tääl sun uásálistij kyevti steligân: njuškiimist sun ovdánij älkkeht finalân, ko vist puomist sun vyerdihánnáá siäivui puomi paaldân ige tondiet piergim nuuvt pyereest.
Keččein ij pááccám epičielgâsin, et Andrade lii vuáittám kyehti olympiakole – vistig Tokio olympialijn 2021 njuškiimist já ton maŋa Pariisi olympialijn 2024 kyelbist. Kole lasseen sun vuoitij kuohtuin olympialijn siilbâ: Tokiost já Pariisist neljikámppádâlmist já Pariisist meid njuškiimist. Andrade lii meid maaŋgâkiärdásâš kolle- já silbâmitalist ivij 2021, 2022 já 2023 MM‑kištoin.
Meid kanadalâš Elsabeth ”Ellie” Black lii täsninommâ steelligvuáimáštâlmist. Sun lii piergim pyereest aalmugijkoskâsijn árvukištoin, já sun lii neeljikiärdásâš olympiavalastâllee. Sun ij lah vuáittám olympiamitalijd, mut neljikámppádâlmist sun lii puáttám niäljádin já puomist viđâdin. Black lii tobdos maaŋgâpiäláágvuođâstis já täsivis oovdânpyehtimijn neljikámppádâlmist. Tääl-uv sun lâi uáli täässiv kuulmâ steligist, veik suu puomičuággáh paccii kukkeláá pyeremuin puátusijn. Neljikámppádâlmist sun ij olláám käävci pyeremuu juávkun, mut suu hárjánem já kuhes karrieer tohhii sust liijká taggaar valastâllee, kiän oovdânpyehtimijd koolgâi čuávvuđ tärhibeht.
Neljikámppádâllâm karssâmijd vuoitij algerialâš Kaylia Nemour, kote lii vuáittám Pariisi olympialijn 2024 kole sierâtäsimieigâsmuorâin. Nubben puáttám Ovtâstum staatâi valastâllee Skye Blakely ij kištottâllâm Pariisist, mut sun kuulâi juávkkudâhân, mii vuoitij kole ivij 2022 já 2023 MM‑kištoin, siilbâ ive 2022 panameriklijn miäštárvuotâkištoin já proonsi vuosmuin nuorâi MM-kištoin ive 2019. Vuáládâhenâmij jieijâs kištottâllee Naomi Visser vist lii uásálistám Pariisi olympialáid 2024, já sun lii lamaš juávkkukištoost 2019 já 2023 Euroop-miäštárkištoin, kuás Vuáládâhenâmeh vuoitij proonsi. Brasilia Flávia Saraiva lii vuáittám juávkkudâhproonsi Pariisi olympialijn 2024 já uásálistám meid ivij 2016 já 2020 olympialáid.
Olympiamitalistij kievrâvuotâ uáinoo eromâšávt lihâstâsâi visesvuođâst toi hástulâšvuođâst huolâhánnáá já meid eromâš kievrâs mentaallijn naavcâin piergiittâllâđ korrâ kištottâllâmtedduu vyelni. Sii paaldâst nuorâbeh valastâlleeh peesih mittediđ jieijâs tääsi maailm njunošij vuástá.
Kiina olympiamitalist koočâi sierâtäsimieigâsmuorâin
Kiina kulá nisonij steelligvuáimáštâllâm njunošân, já meid taat juávkkudâh adelij čáittus noonâ navcâinis. Juávkkudâhkištoost ovtâskâs njunošoovdânpyehtimij lasseen merhâšittee äššin láá oovdânpyehtimij täässivvuotâ já luhostume puoh steligijn.
Kištopiäiván čaavâi kuittâg nube-uv tove vyerdihánnáá dramatiik, tastko kiinalâš Qiu Qiyuan koočâi sierâtäsimieigâsmuorâin. Sun ij lah mihheen vuosâkiärdálijd steelligvuáimáštâlmist, tastko eres miänástusâs lasseen sun lii vuáittám olympiasiilbâ eidu sierâtäsimieigâsmuorâin ive 2024 já maailmmiäštárvuođâ ive 2023. Epiluhostume muštottij-uv tast, mon herkis šlaajâ steelligvuáimáštâllâm lii meid njunošvalastâlleid.
Qiu Qiyuan koččâmist huolâhánnáá Kiina lâi kištopeeivi maŋa njunošist neljikámppádâlmist, tastko puoh iäráseh luhostuvvii pyereest.
Kyeditteijeeh uáinojii já kullojii kištoi ääigi
Kyeditteijei mieldiorroom puovtij energia já lieggâ tobdo tábáhtumán. Sierâ enâmij liipuh livârdii keččei hiŋgálist.
Brasilia valastâlleeh lijjii juávkkudâhhân čuuvtij uáinusist. Rebeca Andrade já Flávia Saraiva oovdânpyehtimij ääigi brasilialiih keččeeh movtáskii nuuvt čuuvtij, et eres jienah iä innig kullumgin areenast.
Ubâ areena vuoiŋâ lâi positiivlâš. Keččeeh onnii áárvust valastâllei pargo já ruokkâdvuođâ. Ohtâ kištopeeivi fijnásumosijn aašijn lâi lattim kištottâllei kuáttá, jis sij iä luhostumgin mottoom uásist nuuvt ko lâi vuordum. Jis kiinii ovdâmerkkân šnukármistij, koočâi puomi teikâ mieigâsmuorâi alne teikâ värdilij, te keččeeh toškuu várugávt kieđâidis já toin naalijn ávžojii kištottâllee ovdániđ jieijâs uásist loopâ räi.
Ryeššiliih kištottâlleeh fáárust liputtáá
Motomeh ryeššiliih kištottâlleeh lijjii luoštum kištoid, mut sij iä uážžum Ukraina suáđi keežild kištottâllâđ Ruošâeennâm liipu vyelni. Sijjân lâi vuáđudum neutraal MM‑juávkku. Puoh ryeššiliih kištottâlleeh iä lam finnim viisum enâmân.
Fiinaalokko juátkoo ain
Rotterdam MM‑kištoh juátkojeh 25. peeivi räi. Oho ohjelmist láá juávkkukištoi finaleh, persovnlâš neljikámppádâllâm já steligijn loppâkištoh. Maailm pyeremuuh steelligvuáimáštâlleeh háputtâlleh tääl‑uv mitalijd, mut jyehi peivi fáálá meid uđđâ hästeid máhđulâšvuođâ pajaniđ uđđâ täsnin.
Vuossaargâ kištottâlmijn čielgâi esken tot, kiäh puohah peesih loppâoho finaláid. Tehelub ko puátuseh lâi kuittâg kištopeeivi eromâš vuoiŋâ. Ahoy lii stuorrâ areena, mii kiäsá pajeláhháá 16 000 olmožid. Liijkágin kuhes rááiđuh tobbeen iä oinuu, nuuvt et organisistem tuáimá eromâš pyereest.
Artikkâlkove: Marja-Liisa Olthuis