Suomâ haldâttâs meridij siskálmittiđ ive 2027 budjetiävtuttâsân iävtuttâs sämikielâlij oppâmateriaalij ruttâdem siäilutmist ive 2026 tääsist ađai 800 000 eurost, muštâl Sämitigge tiäđáttâsâstis. Tiäđuh vuáđuduveh Suomâ ruátálii aalmugpiäláduv tiäđáttâsân.
Algâaalgâst ive 2027 budjetiävtuttâsâst iävtuttui, ete sämikielâlii oppâmateriaalpyevtittem meriruttâ kiäppáničij 200 000 euroin ađai 25 prosentáin.
– Taat lii tehálâš já ovdâsvástádâslâš čuávdus. Pyere tääsi oppâmateriaaleh láá kuávdáš iähtu sämikielâi máttááttâs meritiäđulii oovdedmân. Miärádâs tuárju párnái já nuorâi máhđulâšvuođâid oppâđ já kevttiđ jieijâs kielâ argâpeeivi, iätá Sämitige saavâjođetteijee Pirita Näkkäläjärvi.
Suomâ haldâttâs toolâi budjetráđádâlmijd čohčâmáánu vuosmuu peeivi. Ive 2027 budjetiävtuttâs adeluvvoo ovdâskoodán staatârääđi almosčuákkimist čohčâmáánu 21. peeivi, mon maŋa tot almostittoo čujottâsâst budjetti.vm.fi.
Sämitigge já sämikuávlu kieldah muštotteh staatâ ovdâsvástádâsâst
Sämitiggeest já sämikuávlu kieldâin lii ohtsâš uáinu oppâmateriaalpyevtittem tehálâšvuođâst puoh kuulmâ Suomâst sarnum sämikielâ máttááttâsân. Sämitigge já sämikuávlu kieldah viggii oovtâst vaiguttiđ budjetproosees ääigi meriruuđâ siäilumân. Tääl toh kijtteh máttááttâs- já kulttuurminister Anders Adlercreutz (Ruátáliih) sehe staatârääđi ruttâdem huolâtmist ihán 2027.
– Lii tehálâš, ete sämikielâlij oppâmateriaalij pyevtittem puoh kuulmâ Suomâst ellee sämikielân puáhtá ovdediđ meritiäđulávt nuuvt digitaallii ko teddilum häämist. Taat váátá staatâst čonâdâttâm tuárvi stuorrâ ruttâdmân, iätá Sämitige nubbe värisaavâjođetteijee Tuomas Aslak Juuso.
– Oppâmateriaaleh láá máttááttâs vuáđuiähtu. Staatâ kalga tähidiđ oppâmateriaalij finnim, vâi sämikielâi máttááttâs já sämikielâlii máttááttâs puáhtá orniđ kvaliteetlávt, oovtâviärdásávt já máttááttâsvuáváámij mield, pahudeh sämikuávlu kieldâhoovdah.
Sämitigge västid sämikielâg oppâmateriaal pyevtitmist väldikodálávt
Sämitiggeest lii väldikodálâš ovdâsvástádâs sämikielâlii oppâmateriaalpyevtittem oovdedmist puoh kuulmâ sämikielân.
Oppâmateriaaleh annojeh anarâš-, nuorttâlâš- já tavesämikielâ máttááttâsâst pirrâ Suomâ. Luuhâmive 2025–2026 sämikielâ luhhii tâi sämikielâlii máttááttâsâst lijjii ohtsis 823 uápped ovdâmáttááttâsâst luvâttâhân. Uáppeemere stuárrum já káidusmáttááttâs lasanem tiädutteh sämikielâlij oppâmateriaalij ain lasaneijee táárbu.
Porgemáánust Anarâš aavis muštâlij tast, ete Sämitigge lii almostittám ennuv uđđâ oppâmateriaalijd anarâškielân. Ton maŋa lii almostum vala Ele tiervân ‑tiervâsvuođâ oppâkirje 8. luoka uáppeid.
Käldee:
– Sämikielâlij oppâmaterialij pyevtittem ruttâdem juátkoo siämmáá tääsist ive 2027 staatâ budjetiävtuttâsâst (samediggi.fi)
Kove: Sämitigge