Čevetjávrálâš Irene Fofonoff väljejui nuorttâlij luáttámušolmožin pajan 2027–2029. Sun lâi vaaljâin áinoo iävtukkâs, já nuuvt vaaljâlävdikodde nonnij suu valjim tállán čuávuváá peeivi tast, ko iävtukkâssân asâttâttâm lâi nuuhâm. Lävdikode čuákkim lâi čohčâmáánu vuosmuu peeivi.
– Taat lii munjin stuorrâ kunnee, já siämmást mun iberdâm, et taat lii meid stuorrâ ovdâsvástádâs. Jiem lah kuittâg taa ohtuunân, peic must lii jieččân aalmug stivriimin muu taan luáttámušpargoost, 30‑ihásâš Fofonoff iätá Ylen.
Tááláš luáttámušolmooš Veikko Feodoroff juátká vala taan ive loopâ räi. Feodoroff lii toimâm nuorttâlij luáttámušolmožin ohtsis paijeel kyehtlov ihheed. Sun tuáivut Irene Fofonoffân luho uđđâ pargoost.
Käldeeh:
– Irene Fofonoff on kolttien luottamusmies kaudella 2027-2029 (www.kolttasaamelaiset.fi)
– Kolttasaamelaisten luottamusmieheksi vain yksi ehdokas: Irene Fofonoff valitaan luottamusmieheksi (yle.fi)
Fofonoff Anarâš aavisân: Mij tarbâšep laseresursijd
Luáttámušolmožin Irene Fofonoff haalijd ovdediđ sämmilij tuotâvuotâ- já sovâdâttâmkomissio iävtuttem tooimâid.
Ohtâ täin iävtuttâsâin lii tähidiđ fastâ já tuárvi stuorrâ ruttâdem Nuorttâlâškulttuursiättusân. Fofonoff mield nuorttâlâšsiärvus taarbâš laseresursijd, vâi tot pasta tuođâi porgâđ oovtâst Sämitiggijn ton pyerrin, ete iävtuttâsah ovdáneh já nuorttâlij jienâ kulloo.
– Resursij turvâstem Nuorttâlâškulttuursiättusân já sijdâčuákkimân lii ohtâ puoh tehálumosijn aašijn, vâi nuorttâlâškielâ, ‑kulttuur já ‑eellimvyehi siäiluh eellimvuáimálâžžân meiddei čuávuváid suhâpuolváid. Ličij tehálâš, ete sijdâčuákkim čällee sehe luáttámušolmooš porgâččáin virgekoskâvuođâst iäváge luáttámuštooimâ peht, Fofonoff muštâl Anarâš aavisân.
Fastâ ruttâdem lasseen komissio iävtuttâsah kyeskih eereeb iärrás nuorttâlâšlaahân, puásuituálun, šoŋŋâdâhân, nuorttâlij sajattâhân ortodoksilii kirhoost sehe ávus savâstâlmân pirâstittee ohtsâškuddijn.
Nuorttâlâškulttuursiäđus vuáđudui ive 2008. Ton ulmen lii tuárjuđ já iäláskittiđ nuorttâlâškielâ já ‑kulttuur. Siäđus finnee eennâm- já meccituáluministeriöst kuorâttâllâmvuálásii toimâtorjuu, mon lasseen toimâ ruttâduvvoo eereeb iärrás hahâruttâdmijguin já skeŋkkâruđâiguin. Irene Fofonoff tuáimá siättus saavâjođetteijen paje 2025–2028.
Nuorttâlij luáttámušolmooš
Nuorttâlij luáttámušolmooš oovdâst nuorttâlijd já oovded sii aašijd. Sun eereeb iärrás parga ohtâvuotâolmožin virgeomâháiguin, västid sijdâčuákkimij já nuorttâlâšraađij tooimâst sehe čuávu nuorttâlâškulttuur já -kielâ tile já nuorttâláid kyeskee aašijd.
Luáttámušolmoošvaaljâ uárnejuvvoo jyehi kuálmád ive. Iävtukkâs kalga leđe nuorttâlâš, mättiđ nuorttâlâškielâ já aassâđ nuorttâlâškuávlust. Vaaljâin uážžuh jienâstiđ toh nuorttâliih já sii pelikyeimih, kiäh láá aassâm Aanaar kieldâst ucemustáá 51 peivid ovdil vaaljâpeeivi.
Kove: Irene Fofonoff