Sämikielâliih muččâdumos juovlâlavluuh lávlojeh oppeet skammâ- já juovlâmáánust pirrâ Suomâ. Taaijuv tilálâšvuotâ uárnejuvvoo vuosmuu tove meiddei Kuopiost já Lappeenrantast, muštâl Oulu pispekodde tiäđáttâsâstis.
”Sämikielâliih juovlâlavluuh muštotteh mii tast, ete juovlâi ilosaahâ kulá puoh aalmugáid já kulloo puoh kieláid. Tain kulloo tavekuávlu vuoiŋâm já kirho ohtâsâš jienâ. Lieggâsávt tiervâpuáttim lávluđ oovtâst Kuopion. Juovlâi ilo ovtâstit kielâi já raajij rasta”, tuáivut Kuopio pispe Jari Jolkkonen.
Ucjuvlâš Ánne-Káre Länsman, kote jotá škoovlâ Kuopiost, ana pyerrin tom, ete sun piäsá lávluđ jieijâs kielân.
”Oro, ete kaavpug huušâst sáttá motomin vájáldittiđ, ete lii meiddei nubelágán maailm pääihist tavveen. Uážžu lávluđ jieijâs kielân, ko mudoi kulá nuuvt uccáá sämikielâ. Taah tilálâšvuođah adeleh meid torvolâšvuođâ tobdo, maid jieijâs kielâ já kulttuur pyehtih adeliđ”, Länsman muštâl.
Tilálâšvuođâin juovlâlavluuh lávlojeh nuuvt anarâškielân, nuorttâlâškielân ko tavesämikielân.
Säämi ulguubeln Muččâdumos juovlâlavluuh ‑tilálâšvuođah uárnejuvvojeh čuávuvávt:
- Tu 26.11. tijme 18 Tamperest Puáris kirhoost
- Vá 27.11. tijme 18 Tuurkust Maartikirhoost
- Lá 28.11. tijme 14 Helsig tuámukirhoost
- Pa 29.11. tijme 15 Oulust Karjasilta kirhoost
- Tu 10.12. tijme 18 Lappeenrantast Sammonlahti kirhoost
- Lá 12.12. tijme 18 Jyväskyläst Keltinmäki kirhoost
- Pa 13.12. tijme 16 Kuopiost Pase Johannes kirhoost
- Vu 14.12. tijme 18 Ruávinjaargâ kirhoost.
Ruávinjaargâ servikodde pyevtit sämikielâlijn muččâdumos juovlâlavluin video, mii almostuvá servikode YouTube-tilist skammâmáánu 19. peeivi.
Muččâdumos juovlâlavluuh ‑tilálâšvuođah láá uási Suomâ Vuolgâttâsseervi ärbivuáválii kampanjast, mii tuárju párnáid já sii perruid pirrâ maailm. Suomâ Vuolgâttâsservi almostitij Muččâdumos juovlâlavluuh ‑vihko sämikieláid ive 2022, kuás tábáhtus teevdij 50 ihheed.
Käldee:
– Saamenkieliset Kauneimmat joululaulut laajenevat uusille paikkakunnille (www.oulunhiippakunta.fi)
Kove: Htm (CC BY-SA 3.0 / Wikimedia Commons)