Sämitigge ráhtá­dâđâi virgá­láid ráđá­dâl­máid säm­milij tuotâvuotâ- já sovâdât­tâm­komis­sio toimâ­iävtut­tâsâin

Sämitige čuákkim kieđâvušâi sämmilij tuotâvuotâ- já sovâdâttâmkomissio toimâiävtuttâssáid lohtâseijee olesvuođâ vuossaargâ skammâmáánu nube peeivi.

Čuákkim tuhhiittij Sämitige uáivilijd tagarijn aašijn, moh kiđđuv annojii vuosâsajasâžžân. Taah láá toimâiävtuttâsah 1 (sämiaašij nanodem staatâhaldâttuvâst), 11–13 (šoŋŋâdâhtooimah já meecij suojâlem), 19 (kuálástem­vuoigâdvuođah), 25 (Tiänu kuálástemkiäldui sajanmáávsuh), 34–35 (psykososiaallâš toorjâ sehe sosiaal- já tiervâsvuotâ­­palvâlusah), 43 (kielâi oppâm­vuoigâdvuotâ) já 50–52 (säämi nettivuáđusâš máttááttâs já škovlimruttâdem). Ton lasseen tuhhiittui Sämitige jieijâs, Säämi eellimvuáimán kyeskee iävtuttâs.

Čuákkim kieđâvušâi meid algâmudo uáivilijd toimâiävtuttâssáid 46 (arâšoddâdem ruttâdem) já 47 (kielâpiervâlij turvim), tastko toh spiekâsteh čohčâmáánust 2026 tuhhiittum raami-iävtuttâsâst ivvijd 2028–2031.

Čuákkim adelij saavâjođetteijeid já stiivrân ráđádâllâmvääldi tuotâvuotâ- já sovâdâttâmkomissio iävtuttâsâi olášutmist já oovdedmist.

Čuákkimist tollui meid vuolgâttâssavâstâllâm aalmugijkoskâsii pargo-ornijdume ILO algâ- já hiäimuaalmugáid kyeskee almossopâmuš nr 169 ratifisistmist (toimâiävtuttâs 6). Sämitigge meerrid ääšist ive majemuu čuákkimstis 17.12.2026.

Ráđádâlmeh parlamentaarlijn pargojuávhoin älgih juovlâmáánust

Sämmilij tuotâvuotâ- já sovâdâttâmkomissio avžuuttâsâid árvuštellee parlamentaarlâš pargojuávkku lâi toimâttâm Sämitiigán algâmudo uáivilijdis komissio toimâiävtuttâsâin eereeb iävtuttâsâst 16 (sämmilâš puásuituálu) já iävtuttâsâin 62–68 (kirholiih ääših). Sämitigge vist lâi valmâštâllâm jieijâs uáivilijd toimâiävtuttâssáid já vástádâsâid pargojuávhu algâmudo uáiviláid, mondiet äšši kieđâvuššui skammâmáánu nube peeivi Sämitige čuákkimist.

Sämitiggelaavâ 9 § miäldásiih ráđádâlmeh parlamentaarlijn pargojuávhoin älgih juovlâmáánu aalgâst.

– Čuákkim miärádâsah hämmejeh vuáđu ráđádâlmáid Suomâ staatáin. Lii tehálâš, ete toimâiävtuttâsâi olášuttem ovdeduvvoo vuáváámij vuáđuld, meritiätulávt já tuođâlii ohtsâšpargoost sämmilijguin. Sovâdâttâm huksim váátá koŋkreetlijd tavoid, iätá Sämitige saavâjođetteijee Pirita Näkkäläjärvi.

Sämmilij tuotâvuotâ- já sovâdâttâmkomissio luovâttij loppâraportis juovlâmáánust 2025 staatârááđán, Sämitiigán já nuorttâlij sijdâčuákkimân. Loppâraapoort siskeeld avžuuttâsâid já toimâiävtuttâsâid, moiguin ovdediđ sovâdâttâm já tivvoođ sämmilij vyettim historjálijd já tááláid puástuvuođâid.

Käldee:
– Sämitigge ráhtádâđâi virgáláid ráđádâlmáid sämmilij tuotâvuotâ- já sovâdâttâmkomissio toimâiävtuttâsâin (samediggi.fi)

_{Kove: Sämitigge / Johanna Alatorvinen}