Ovtâstum staatâin demokraateh láá vuáittám eenâblovo sehe senatist já ovdâsteijeivisteest nuuvt kočodum koskâvaaljâin. Sij haldâšeh parlament republikaanpresident Donald Trump loppâpaje ääigi.
Puáđus sáttá tovâttiđ vädisvuođâid Trumpân, tastko demokraateh pyehtih tääl vaiguttiđ suu miärádâssáid. President Trump eeđâi majebaargâ já koskoho koskâsii iijâ, ete sun lii vaalmâš tuhhiittiđ puáttus.
Senatist demokraateh vuoittii republikaanijn kuittâg čiččâm saijeed. Čyeđe senaattor senatist láá tääl 52 demokraatij senaattorid, 44 republikaanij senaattorid sehe kyehti jiečânâs senaattor, kiäh lává demokraatij peln. Kyehti saje láá vala áávus taan artikkâl almostittemääigi.
Demokraateh vuoittii senaattor saje meiddei tagarijn uásistaatâin, kost sij iä lah vuáittám vaaljâid majemui luuvij iivij. Tágáreh uásistaatah láá ovdâmerkkân Texas já Kansas.
Ovdâsteijeivisteest demokraatijn láá tääl 229 saijeed, republikaanijn vist 139 saijeed. 67 saijeed láá vala áávus. Eenâblovo várás tarbâšuvvojeh 218 saijeed.
Jienâstempeivi lâi majebaargâ skammâmáánu nube peeivi.
Koskâvaaljân kočoduvvojeh vaaljah, moh tuállojeh Ovtâstum staatâi president nelji ive pištee paje pelimuddoost. Ovdâsteijeiviste virgeh pišteh kyehti ive, já nuuvt vaaljah-uv tuállojeh jyehi nube ive. Senaattorvirgeh vist pišteh kuttâ ive, mut toh láá uárnejum toin naalijn, ete jyehi nube ive suullân 33 prosentid sist mulsâšuveh.
Käldee:
– BBC njuolgâ čuávvum (www.bbc.com)
Kove: Valtteri Valkeapolku, MapChart (CC BY-SA 4.0); Käldee: BBC