Balkan njargâenâmist leijee Serbia täsiväldi finnee uđđâ jođetteijee. Pasepeeivi parlamentvaaljâin nuuvt kočodum uáppei listo vuoitij eennâm kuhesáigásii jođetteijee já ovdii president Aleksandar Vučić. Uáppeeh láá ornim Serbiast haldâttâs vuástásijd mielâčáittusijd jo kyehti ive, já tondiet vaaljah uárnejuvvojii tolebáá ko koolgâi.
Vučić mieđettij táápu maŋŋeed pasepeivieehid. Suu mield uáppei listo finnee 135–140 saijeed parlamentist, ko vist suu jieijâs piäládâh páácá suullân 105 sajan. Uáppeelihâstâs listoost láá 250 iävtukkâssâd. Sii juávhust láá eereeb iärrás tuáhtáreh, ollâopâttâhmáttáátteijeeh já eres äššitobdeeh.
Vaaljâi jienâstemprooseent lâi puoh stuárráámus majemui 30 ihán, já jienâstemsoojijn lijjii kuhes rááiđuh jo ovdil jienâstem älgim. Ko puáđus čielgâi, te Serbia uáivikaavpug Belgrad kááđuh tievvii ávudeijein.
Uáppeeh jođettii pooliitlii nubástus
Aleksandar Vučić já suu ovdedempiäládâh SNS láá haldâšâm Serbia 14 ihheed. Tuđâhánnáávuotâ eennâm njunošáid juuvsâi alemuu saajees skammâmáánu vuosmuu peeivi 2024, ko Novi Sad ryevdirađesajattuv kááđus koočâi já surmij 16 olmožid. Ulmuuh sujâttii päärtist vijđes korruptio.
Uáppei oholiih mielâčáittuseh ollâopâttâhkampusijn já kááđuin vijđánii ubâ enâmân já aalmugân.
Kuhháá jotkum mielâčáittusij maŋa president Vučić račoi eennâm parlament čohčâmáánu aalgâst já meridij, ete uđđâ parlamentvaaljah uárnejuvvojeh roovvâdmáánu 25. peeivi. Táválii äigitaavlu mield toh liččii uárnejum esken juovlâmáánust 2027.
Čohčâmáánu loopâstkis Vučić iäránij president virgeest. Suu nubbe presidentpaje ličij nuuhâm puáttee ive vyesimáánust, já Serbia vuáđulaahâ iästá suu ucâmist kuálmád paje. Vučić ulmen lâš lamaš vyeittiđ parlamentvaaljâid já šoddâđ oppeet Serbia uáiviministerin, mon virgeest sun poorgâi iivijd 2014–2017.
Käldeeh:
– Serbian pitkäaikainen johtaja Vučić myöntää tappionsa parlamenttivaaleissa (yle.fi)
– Euroopan mini-Venäjä äänestää tänään – nuoret yrittävät tehdä sen, mihin kukaan ei ole pystynyt 14 vuoteen (yle.fi)
– Entinen presidentti myöntää tappion opiskelijaliikkeelle: Belgradin kaduilla juhlitaan (www.hs.fi)
– Celebrations in Serbia after veteran ruler Vučić loses election to student-led protest movement (www.bbc.com)
– Joy and disbelief on Serbian streets as Vučić concedes election defeat (www.bbc.com)
– How a movement of students brought down Serbia’s Vučić (www.bbc.com)
Kove: Stefan Miljuš (Wikimedia Commons)