Islandliih láá jienâstâm lávvárduv tast, piäijojeh-uv EU-jeessânvuotâráđádâlmeh joton uđđâsist vâi iä. Koččâmuš EU‑jeessânvuođâst lii juáhám Island jo kuhháá. Ovdebááh ráđádâlmeh koskâldittojii ive 2015. Taankiärdásii jienâstem loppâpuáđus lâi, et Island ij piejâ ráđádâlmijd joton.
Island radiofinnoduv RÚV mield jienâstem lâi eromâš čoovgâs. Jienâstmist 58,2 prosentid vuástálistii ráđádâlmij jotonpieijâm já 47,2 prosentid kyedittii jurduu. Uáivileh juáhášuvvii čielgâsávt kuávlui mield: Reykjavikist ráđádâlmij juátkim kyedittui čuuvtij eenâb ko eres kuávluin, kost eenâbloho lâi ráđádâlmij vuástá. Aalmugjienâstem puáđus nannee vuod sii sajattuv, kiäh halijdeh, et Island siäilut tááláid koskâvuođâidis EU:n toin naalijn, et tot ij lah EU oles jeessân.
Island njunošminister Kristrún Frostadóttir lii tutâvâš islandlij jienâstemaktiivlâšvuotân. Sun kuittâg tuáivu, et jienâstem puáđus ij juáváččii ohtsâškode ige kuáđáččii kieŋâlis haavijd. Sun tiäduttij ovdil jienâstem, et vuáitus te kuábáš uáinu peri, mut ferttee kunnijâttiđ puáttus já juátkiđ savâstâllâm ohtsâškode huksiimáin.
Vižže kuáská eromâšávt toos, kii talle piäsá meridiđ Island kuálástemčaasijn, jis Island ličij EU jeessân.
Käldeeh:
– Icelandic voters reject a proposal to restart negotiations to join the European Union (apnews.com)
– Vonar að niðurstaðan kljúfi ekki þjóðina eða skilji eftir sig sár (www.ruv.is)
Kove: Sofia Olthuis