Oulu ollâopâttâh lii lekkâm Oulu kuávdážân uđđâ oppâm- já kuáhtámsaje, mon nommâ lii Ydin ’Vááimus’. Ton ulmen lii pyehtiđ ollâopâttuv, tiettuu, uáppeid já totkeid aldeláá kaavpug ässeid.
Anarâš aavis eelij uápásmuumin sajan tuorâstuv skammâmáánu viiđâd peeivi.
Oulu ollâopâttuv viestâdemhovdâ Elina Mattila-Niemi (artikkâlkooveest) muštâl aavisân, ete ollâopâttâh lii jo kuhháá tuáivum, ete tot ličij mieldi meiddei kaavpug kuávdáást.
– Nube tááhust uáppeeh láá tuáivum oppâm- já juávkkupargosoojijd. Nube tááhust mij jiejah lep halijdâm, ete ollâopâttâh oinuuččij mottoomnáál kuávdáást já mist ličij eenâb vuáruvaikuttâs kaavpug ässeiguin, Mattila-Niemi muštâl.
Oulu ollâopâttuv tááláš váldukampus lii Linnanmaast kuuđâ kilomeetter keččin kuávdáást. Ollâopâttâh lii kuittâg huksiimin uđđâ váldukampus Kontinkangasân, mii lii kuulmâ kilomeetter keččin kuávdáást.
Ydin-tábáhtussaje lii aaibâs Oulu kuávdáást čujottâsâst Isokatu 32. Tot lekkui roovvâdmáánu 27. peeivi.
Kátutääsist lii puohháid ávus tile
Ydin-saajeest láá kyehti keerdi. Kátutääsist lii aalmugsaje, kuus uážžuh puáttiđ kiäh peri. Tobbeen puáhtá eereeb iärrás oppâđ, porgâđ já teivâđ ulmuiguin. Kátutääsi lii áávus majebaargâst tuorâstâhân tijme 12–18.
Taan tiileest uárnejuvvojeh meiddei jieškote-uvlágáneh tilálâšvuođah, moh lohtâseh mottoomnáál ollâopâttuv tooimân. Elina Mattila-Niemi iätá, ete sun västid eromâšávt tilálâšvuođâi ohjelm sundáttâlmist. Ovdil tuorâstuv tilálâšvuođah lijjii lamaš ohtsis nelji, já Mattila-Niemi mield toid láá uásálistám táválávt 20–40 olmožid.
Tuorâstâheehid pääihi oolâ lijjii čokkânâm suullân kyehtlov olmožid kuldâliđ luvâlduv keeđgijn. Kiäsut keeđgijd-uv? Maid keeđgih já geologia muštâleh mijjân ‑nommâsii luvâlduv toolâi náguskirjetotkee Tapio Soukka Oulu ollâopâttuv Materiaalanalyyskuávdáást já Virtuaallii keđgimuseost.
Ydin-saje puáttee tilálâšvuođah uáinojeh Oulu ollâopâttuv tábáhtuskalenderist.
Pajekerdi lii väridum ollâopâttuv uáppeid já pargeid
Ydin-saje pajekeerdist láá oppâm-, juávkkupargo- já čuákkimsajeh. Toh láá uáivildum Oulu ollâopâttuv uáppeid já pargeid, já uksâ pajekiärdán lekkâs persovnlijn kolgokorttáin. Pajekerdi lii áávus jyehi peeivi tijme 8–21.
Tuorâstâheehid pajekeerdist uáppeeh lijjii suullân loves tiäturijdiskuin. Lotta Teeri, kote lohá Oulu ollâopâttuvâst eŋgâlâskielâ, lâi puáttám porgâđ tutkâmraportáin. Sun lâi pääihi alne jo nube tove.
– Mun lam uáli ilolâš, ete kuávdážân lii puáttám tággáár oppâmsaje, kost lii mudágávt saje já rávhálâš piirâs. Mun aasâm kuávdáást, nuuvt ete lii älkkeb puáttiđ teehin ko vyelgiđ ollâopâttâhân, Teeri iätá.
Pajekeerdi kyessikirje mield eres-uv uáppeeh láá tuđâvááh. Kyessikiirján lii čallum ennuv positiivlâš macâttâs tast, ete saje lii čurgâd, rávhálâš já pyeri oppâmân. Fáárust láá meid ovdedemiävtuttâsah. Uáppeeh tuáivuh eereeb iärrás mikro sehe lukkâskaapijd tävirij várás.
Artikkâlkove: Valtteri Valkeapolku