Oulu ollâopâttâh áigu luoppâđ Linnanmaa váldukampusist, tastko tot tarbâšičij stuorrâ vuáđutivvoom. Ollâopâttâh huksee aaibâs uđđâ kampus Kontinkangasân, kost tääl lii jo ovdâmerkkân talhâstieđâlâš tieđâkodde. Kontinkangas lii kuulmâ kilomeetter keččin Oulu kuávdáást, Linnanmaa vist kuuđâ kilomeetter keččin. Varriimist meridui Oulu ollâopâttuv haldâttâs čuákkimist skammâmáánu 25. peeivi.
– Linnanmaa kampus lii maŋgâsân rähis saje, já toimâ tobbeen lii lamaš uáli jo tehálâš ovdedemmuddo ollâopâttâhân já ubâ kaavpug šoddâmân. Lii ahheev luoppâđ Linnanmaast, mutâ mii pargon lii visásmittiđ forgâ 70-ihásii Oulu ollâopâttâhân puoh pyeremuu miänástus puátteevuođâst, muštâl ollâopâttuv haldâttâs saavâjođetteijee Mikko Ayub.
Čuákkimist lijjii árvuštâllâmnáál meid kyehti eres muulsâiävtu. Nube iävtuttâsâst Linnanmaa kampus ličij tivvum, nube iävtuttâsâst vist liččii huksejum uđđâ kampus Kontinkangasân já ucceeb kampus Oulu kuávdážân. Árvuštâlmist ohtâ stuorrâ já uđđâ kampus Kontinkangasist onnui puoh pyeremussân čuávdusin eromâšávt ekonomisij suujâi tááhust. Tehálâš lâi meid tot, ete puoh uáppeeh láá siämmáin soojijn, sehe tot, ete Oulu ollâopâttâhlâš pyecceiviäsu OYS lii uđđâ kampus aldasijn.
Áárvu mield uđđâ kampus huksim šiäštá 200 miljovn eurod 30 ivveest. Tot lâi meid áinoo muulsâiähtu, mii juksá haldâttâs uulmán toollâđ kiddodâhkuástádâsâid enâmustáá 11 prosentist ollâopâttuv oleskuástádâsâin čuávuvái 30 ive ääigi.
Huksim pištá maŋgâ ive
Uđđâ soojij sundáttâllâm álgá puáttee ive aalgâst. Huksim vist álgá tolemustáá ive 2027. Vuosmužžân huksejuvvojeh sajeh Kontinkangasist jo orroo tieđâkuddijd. Ubâ proojeekt pištá suullân love ihheed.
– Vaarâ kyehti-uv uáppeesuhâpuolvâ máttáátteleh vala tááláin kampusijn ovdil ko puoh lii sirdum taan ohtâsii kampusân, iätá Oulu ollâopâttuv rehtor Arto Maaninen.
Uđđâ ollâopâttuv vijđodâh lii suullân 75 000 neljihâšmeetterid, mii lii suullân 40 prosentid ucceeb ko tääl Linnanmaast. Kampus huksejuvvoo sajan, kost OYS puáris huksiittâsah pieđgejuvvojeh.
Uđđâ kampus lasseen Oulu kuávdážân puátá nuuvt kočodum Tiettuu orroomviste, mii lii puohháid ávus saje, kost puávtáččij orniđ ovdâmerkkân luvâlduvâid já tábáhtusâid. Ton tärhis saje ij lah vala tiäđust. Ulmen lii, ete Tiettuu orroomviste valmâštuvá jotelubbooht ko uđđâ kampus.
Miärádâs lii valdum vuástá positiivlávt
Oulu ollâopâttâhkode haldâttâs saavâjođetteijee Vilma Sippola lii tutâvâš toos, ete miärádâs uđđâ ollâopâttuvâst lii viijmâg tohhum. Suu mield uáppeeh láá valdum pyereest fáárun miärádâs tohâmân. Uđđâ kampusist Sippola tuáivu, ete tobbeen láá tuárvi juávkkupargosajeh já meid sajeh uáppeeservijd.
Oulu Giellagas-instituut hovdâ Sigga-Marja Magga muštâl Anarâš aavisân, ete sun vuárdá sahhiis mieláin varrim já tom, mana-uv puoh vuáváámij mield. Magga tuáivu, ete ubâ humanistlâš tieđâkodde varriiččij siämmáá ääigi já pisoččij ain oovtâst.
Giellagasâst káidusmáttááttâs kiävttoo ennuv. Magga iätá, ete love ive keččin ollâopâttuv fyysisii saajeest ij lah Giellagas tooimân nuuvtkin merhâšume, tastko káidusmáttááttâs kvaliteet ovdán ain. Sun muštoot kuittâg, ete meid Kontinkangasist kalgeh leđe sajeh Säämi kulttuurarkkâdâhân. Arkkâduvvâst vyerkkejuvvoo sämikieláid já -kulttuurân lahtoseijee kulttuur- já tutkâmamnâstâh, já tot lii tääl Linnanmaast Giellagas soojijn.
Käldeeh:
– Yliopiston hallitus valitsi jatkokehitykseen Kontinkankaan yhden kampuksen skenaarion (www.oulu.fi)
– Oulun yliopisto muuttaa Kontinkankaalle – Keskustaan tulee kaikille avoin Tieteen olohuone (www.kaleva.fi)
– Oulun yliopiston raju ratkaisu: nykyisistä tiloista luovutaan ja edessä on jättimuutto lähemmäs keskustaa (yle.fi)
Kove: Valtteri Valkeapolku