Maailm tiervâsvuotâornijdume WHO lii tuhhiittâm vuosmuu eromâšávt eskenšoddâm umogáid uáivildum malariatalkkâs.
Malaria lii čuoškâi levâttem trooppisâš tavdâ, mii lii Afrikist eromâš koddee puácuvuotâ. Ive 2024 maailmist lijjii paijeel 280 miljovn malarianjuámumid, já taavdân jammii 610 000 olmožid. Taavdân jammii eromâšávt vuálá viiđâihásiih párnááh.
Taan räi malarian puáccám umogááh láá tipšum talkkâsijgijn, moh láá algâalgâlávt uáivildum puárásub párnáid. Taat lii lasettâm riiskâ talkkâsij puástumeereest já toi hááituin já mirhâttâstábáhtusâin eskenšoddâm párnáin.
WHO mield uđđâ talkkâs tuhhiittem taha máhđulâžžân ton uástim já kevttim almolijn tiervâsvuotâvuáháduvâin. Ornijdume njunošhovdâ valdâl miärádâs merhâšittee lävkkin ovdâskulij malaria estimist.
WHO arvâlusâi mield tuhhiittem puáhtá pyerediđ joba nyevt 30 miljovn umogáá tipšo jyehi ive Afrikist. Ornijdume mield malariast iärunpeessâm ij innig lah tuše ulme mut realistlâš máhđulâšvuotâ.
Siämmást WHO lii meid tuhhiittâm uđđâ teestâid, moi iššijn malaria puáhtá kavnâđ tärhibeht ko ovdil.
Uđđâ talkkâs tuhhitmist muštâlui Maailm malariapeeivi cuáŋuimáánu 25. peeivi. Taan peeivi ulmen lii lasettiđ tiäđu malaria tuástumist.
Käldee:
– WHO: nieuwe behandeling tegen malaria voor baby’s goedgekeurd (nos.nl)
Kove: HarunaSylvester (Wikimedia Commons)