Suomâ haldâttâs meridij tuorâstuv staatârääđi almosčuákkimist, ete tot čavgee viisumij mieđettem ryeššiláid valastelleid. Suomâ olgominister Elina Valtosii (kok.) mield Ruoššâ kiävttá valastâllâm propaganda koskâuámmin.
– Nubástus ulmen lii estiđ taggaar enâmânpuáttim, maid Ruoššâ puáhtá anneeđ ävkkin volliittemsuáđis tuárjoo saavâi leevâtmân, Valtonen iätá.
Suomâ lii jo ovdil raijim ryeššilij enâmânpuáttim nuuvt, ete ryeššiliih turisteh iä lah finnim viisumijd Suomân maaŋgâ ihán. Taan räi valastelleeh láá puáhtám finniđ viisum, jis sii pargomätki Suomân lii pištám vuálá 90 peivid. Tääl taat muttoo toin naalijn, ete viisum mieđettuvvoo tuše talle, jis pargo lii velttidmettum Suomâ aalmuglii hiäđu tiet. Tággáár lii ovdâmerkkân huolâttâsvisesvuotân lohtâseijee pargo.
Nubástus puátá vuáimán vuossaargâ skammâmáánu 16. peeivi. Viisumeh, moh láá mieđettum ovdil tom, iä macâttuu.
Haldâttâs riemâi tooimân ryeššilij valastellei enâmânpuáttim estimân ton maŋa, ko Valastâllâm aalmugijkoskâsâš áánnumtuámustovli CAS meridij, ete Ruoššâ kalga valduđ fáárun aalmugijkoskâsii jieŋâskiärun. Miärádâs maŋa maaŋgah jieŋâskiärruenâmeh almottii, ete toh iä speelâ Ruošâ vuástá.
Ovdâmerkkân Suomâ čuoigâmlito toimâjođetteijee Marleena Valtasola lii ilolâš haldâttâs miärádâsâst.
– Nuuvt kuhháá ko volliittemsuáti lii joođoost, ij lah pyeri, ete ryeššiliih valastelleeh uásálisteh kištoid, Valtasola iätá Ylen.
Taažâ ij haalijd ryeššilijd valastelleid enâmân
Meiddei Taažâ haldâttâs meridij tuorâstuv viisumij iävtui čovgiimist. Tot kuáská sehe ryeššiláid já vielgisryeššiláid valastelleid. Miärádâs puátá vuáimán forgâ.
Taažâ haldâttâs tiäđáttâsâst čálloo, ete Ruošâ njunošvalastâlmist láá kievrâs koskâvuođah Ruošâ virgeomâháid já staatâ ráhtusáid. Tondiet haldâttâs lii ton uáivilist, ete Ruošâ uásálistem aalmugijkoskâsii valastâlmân ij pyevti jurdeđ sierâ Ruošâ volliittemsuáđist Ukraina vuástá. Vielgis-Ruoššâ vist lii tuárjum já ovdedâm Ruošâ suátitooimâid.
Miärádâs tyehin lii tot, ete majemui aaigij Aalmugijkoskâsâš olympiakomitea já maaŋgah aalmugijkoskâsiih valastâllâmlitoh láá tiptám ryeššilijd já vielgisryeššilijd maccâđ aalmugijkoskâsii valastâllâmtooimân jo‑uv neutraal valastellen tâi joba njuolgist jieijâs eennâm ovdâsteijen. ”Tondiet toi njunošvalastellei já sii toorjâulmui meeri, kiäh halijdeh puáttiđ Taažân kištottâllâđ, lii lasanâm”, čálloo tiäđáttâsâst.
Kanada ij lyešti ryeššilijd jieŋâskiärrukištoid
Kanada haldâttâs almottij koskoho, ete tot ij mieđeet viisumijd ryeššiláid jieŋâskiärruspelleid vuálá 20‑ihásij MM‑kištoi várás. Meiddei toh ryeššiliih, kiäh spellih Kanadast NHL‑speelâid, iä uážu uásálistiđ kištoid. Miärádâs kuáská meiddei vielgisryeššiláid.
Kanada valastâllâmminister Adam van Koeverden vuáđustij miärádâs siämmáánáál ko Suomâ já Taažâ‑uv:
– Taah tooimah iä lah tárguttum Ruošâ iäge Vielgis-Ruošâ aalmugij vuástá. Toi ulmen lii estiđ tom, ete Ruošâ já Vielgis-Ruošâ haldâttâsah aneh ävkkin Kanada ornim aalmugijkoskâsijd valastâllâmtábáhtusâid jieijâs propagandan. Nuuvt kuhháá ko Ruoššâ juátká volliittemsuáđis Ukraina vuástá, mij ep maacâ normaal tooimân, Koeverden iätá.
Vuálá 20‑ihásij MM‑kištoh uárnejuvvojeh Kanadast Edmontonist já Red Deerist juovlâmáánu 26. peeivi rääjist. Toh láá vuosmuuh jieŋâskiärrukištoh, moid Ruoššâ uážuččij CAS miärádâs mield uásálistiđ. Taažâ jieŋâskiärrulito mield IIHF sundáttâlâi Ruošâ juávhu väldim Taažâ juávhu sajan kištoid.
Käldeeh:
– Venäläisurheilijoiden viisumeja rajoitetaan – Valtonen: Urheilu on Venäjälle propagandan väline (yle.fi)
– Norja otti mallia Suomesta, epää venäläisurheilijoiden viisumit (yle.fi)
– Canadian government tells Hockey Canada it will not issue visas for Russians to play in WJC (www.tsn.ca)
Kove: Granada (CC BY-SA 4.0 / Wikimedia Commons)