Taankiärdásâš Kollekielâ-palhâšume lii mieđettum emeritusprofessor Nils Øivind Helanderân. Palhâšume mieđettui sunjin kuhes já maaŋgâpiäláág eellimpargoost sämikielâi oovdedmist. Palhâšume keigejui sunjin Helsigist skammâmáánu 11. peeivi. Kollekielâ-palhâšume juáhhoo jyehi nube ive.
Palhâšume mieđettem vuáđuštâlmij mield Helander lii vaiguttâm merhâšitteht tavesämikielâ kielâtipšom já terminologia máttáátteijen, totken já kielâäššitobden.
Helander pargo uáinoo maŋgâi suhâpuolvâi sämikielâ áámmátulmui škovliimist já kielâtiäđulâšvuođâst. Suu pargo akateemisii sämikielâ ovdedem oovdân lii lamaš áinooluándusâš.
Helander lii porgâm eereeb iärrás Tromssa ollâopâttuvvâst, Säämi ollâškoovlâst Kuovdâkiäinust já Taažâ Sämitiggeest.
Kollekielâ-palhâšume uážžoo almottui Helsigist Suomâ, Ruotâ já Taažâ sämiaašijn västideijee ministerij já enâmij Sämitigij sahâtuállei čuákkim ohtâvuođâst.
Kollekielâ-palhâšume lii vuáđudum ive 2004 sämikielâi ovdedem- já iäláskittemtoimâi movtijdittem várás. Kollekielâ-árvuštâllâmkomitea väljee palhâšume uážžoo toos vuolgâttum iävtuttâsâin. Komitea puáhtá meid jieš iävtuttiđ hiäivulii iävtukkâs. Palhâšume lii 15 000 eurod.
Anarâš aavis teeivâi Nils-Øivind Helanderáin palhâšumejyehim maŋa. Helander muštâl, et sun lâi ilolâš já olâttum já positiivlávt hirmástum palhâšuumeest. Sun masaba ij västidâm puhelimân, mut liijká västidij já eeđâi, et sun illá oskoi ko staatârääđi virgeolmooš sooitij sunjin já muštâlij, et sun lâi finnim Kollekielâ-palhâšume. Juhlesaavâin sun kuulâi, et Kollekielâ-palhâšume árvuštâllâmkomitea lii lamaš oovtâmielâlâš palhâšume mieđeetmist. Juhlepeivi lâi lamaš sunjin kukke mut eromâš mieláidpäccee.
Käldee:
– Saamen kielipalkinto Gollegiella Nils Øivind Helanderille (valtioneuvosto.fi)
Artikkâlkove: Ann-Mari Ruhanen, staatârääđi kanslia (CC BY 4.0); Raijim: Valtteri Valkeapolku