Eŋland já Ranska spelláin smavvâfinalist Miamist 19. peeivi älgidijn koskiijâ Suomâ ääigi.
Eŋland kyehti kievrâ spellee, koskâkieddispellee Jude Bellingham já volliitteijee Harry Kane, čokkáin speelâ älgidijn muulsâpeeŋkâst. Sunnust Kane ij spellâm ollágin, já Bellingham poođij kiedi oolâ esken nube spellâuásist. Vuodâttemvääivist huolâhánnáá Ranska Kylian Mbappé speelâi ubâ speelâ.
Vuáládâheennâm ovddij jyelgipálluspellei tv-čielgim mield vuárdámuš smavvâfinalist lii ain aktiivlâš volliittemspellâ kuohtui pelij já ennuv saje kiedi alne, já moolah šaddeh talle jotelávt já ennuv. Nuuvt keevâi taan-uv speelâst. Speelâst eromâšávt Ranska adelij ennuv saje Eŋland vollitmáid.
Vuosmuš spellâuási
Vuosmuu vaartâ ääigi Eŋland volliittij čielgâsávt kievrâsubbooht.
Jo kuálmád minuttist Eŋland Declan Rice, kote tääl speelâi volliitteijee Kane kieddisaajeest, niistij páálu Ranskaast, kaavnâi šiev rääigi já peesâi ráávhust pääččiđ páálu moolân. Nuuvt Eŋland moonâi 1–0 ovddiibel.
Vuosmuu moolâ maŋa spellâ ovdánškuođij hitásubbooht. Algâvaartâ korrâ liähtu ubâ speelâ ääigi ij lam ubâ vyerdittetteegin paijeel 30 ceehi pakkâsist.
Juuhâmpuudâ maŋa Eŋland volliittij ain. Vistig robdâvolliitteijee Bukayou Saka moolâ hilgui olgospeelâ keežild. Tállân palij ton maŋa 18. minuttist Eŋland finnij kulmečievčâstem. Taan Rice pääččim kulmečievčâstempáálu piälušteijee Ezri Konsa stivrij tastoo moolân.
Vaartâ maŋeláá 36. minuttist Eŋland peesâi luovâs uálgisroobdâst já puovtij páálu jotelávt volliittemkuávlun. Ranska moolâvahtâ poođij olgoláá moolâst, já taan tiileest robdâvolliitteijee Bukayo Saka finnij páálu já paajij tom moolân. Täst šoodâi jo 3–0 Eŋlandân.
Já eidu ovdil puudâ Bukayo Saka peesâi uđđâsist luovâs, já nuuvt Eŋland ovdâmätki kuhoi jo numeráid 4–0 ääigist 45 + 1 miinut.
Puáhtá pyereest ettâđ, et Eŋland speelâi miäštárlávt vuosmuu uási já lâi sikkomin lättee Ranskain. Tot oroi tágárij numerijgijn monâmin čielgâ vuáitun.
Nubbe spellâuási
Puudâ maŋa mielâkiddiivâžžân koččâmuššân šoodâi, puávtáččij-uv Ranska porgâđ maiden Eŋland čielgâ paijeelvuáimán.
Olâttâsah lijjii, tastko kiedi oolâ poođij-uv aaibâs nubbe Ranska, mii finniiškuođij speelâs oornigân. Koččâmuš paijeelvyeimist koolgâi-uv jotelávt jorgettiđ já koijâdiđ nubenáál: Jis Ranska algâttij spellâmis 4–0 táppusaajeest, te puovtij-uv tágárij numerijgijn vala jorgettiđ speelâ jođo já vyeittiđ? Taat koččâmuš lâi realistlâš, tastko Eŋland nohádij.
Ääigist 47 minuttid Ranska koskâkiedi volliitteijee Kylian Mbappé paajij Ranska vuosmuu moolâ já kezidij speelâ lovvoid 4–1. Taat moolâ lâi Mbappé 21. moolâ MM-tääsist, nuuvt et sun peesâi moolâlistoost táásá Argentiina moolâkunâgâssáin Lionel Messijn. Taan moolâ maŋa suoi kuohtuuh láin tastoo pááččám oovce moolâd táin MM-kištoin. Mielâkiddiivâžžân koččâmuššân šoodâi-uv, monâččij-uv Mbappé vala Messist ovddiibel taan speelâ ääigi.
Ranska aktiivliih vollitmeh juátkojii, já 54. minuttist volliitteijee Bratley Barcola stuŋgiittij čižetroobdâst já čievžâstij páálu moolân, nuuvt et spellâ šoodâi numeráid 4–2. Taan moolâ maŋa speelân šoodâi aaibâs nubelágán liähtu, ige kyevti moolâ tyehin spellâm velttidhánnáá innig merhâšâmgin ubâ speelâst táppám. Ranskaast lâi pággu volliittiđ, mii nube tááhust adelij Eŋlandân ennuv saje kiedist.
Ranska vollitmeh puohtii šiev puátusijd, tastko Kylian Mbappé paajij 66. minuttist tavâlân jo 4–3. Tääl sust šoodâi MM-kištoi moolâkunâgâs adai ohtsis 22 moolâd puoh MM-turnaamijn já 10 moolâd taantovásii MM-turnaamist.
Ranska haldâšij speelâ loppâuási, já Eŋland kaartâi korrâsávt piäluštiđ mut koolgâi meid volliittiđ. Majemui love miinut ääigi lâi mielâkiddiivâš, piđáččij-uv Eŋland vala loopâ räi. Tot kale finnij muáddi šiev pääččimsaje mut ij luhostum pääččiđ moolâ. Siämmáánáál Ranska finnij šiev pääččimsoojijd mut totkin ij luhostum tassiimist.
Tastoo speelâ puáđus oroi visásmuumin, ko Eŋland finnij ráŋgáštâsčievčâstem 84. minuttist. Taat poođij tast, ko Ranska piälušteijee Malo Gusto nurdâstij káávvud Eŋland piälušteijee Djed Spence. Ráŋgáštâsčievčâstem paajij moolân Saka, kote ij lah vala monâttâm oovtâgin ráŋgáštâsčievčâstem táin kištoin. Taat suu kuálmád moolâ lâi Hat trick adai hattâkonstâ taan speelâst. Adai spellâ lâi tääl tiileest 5–3. Vuáládâheennâmliih ovddiih jyelgipálluspelleeh smietâdii, et taat kyevti moolâ ovdâmätki koolgâi jo visásmittiđ vuáitu.
Mut liijká vuástálisten lâi Ranska, kote ij nyevt peri áigum vuálániđ – eromâšávt ko tuámmár adelij val čiččâm minuttid jotkâääigi speelân.
Ranska Ousmane Dembélé keevtij taam ääigi já kezidij speelâ kyehti miinut ovdil ääigi nuuhâm numeráid 5–4. Sun lii eromâš jotelis spellee, kote val čievčâst tárkká kuohtui juolgijdiskijn.
Tuámmár ij lopâttâm speelâ koskân volliittem já tiiptij speelâ jotkuđ. Jotkâääigi majemuin sekuntijn Eŋland koskâkieddispellee Jude Bellingham peesâi luovâs já čievčâstij páálu moolân, nuuvt et speelâ loppâpuáđus lâi 6–4 Eŋlandân.
Veikâ koččâmuš lâi ”ahevis” smavvâfinalist, te spellâ lâi eromâš mielâkiddiivâš já hävskis jyelgipállu keččeid.