Čuávuvááh sämitiggevaaljah láá 23.8.–3.10.2027. Vaaljâluvâttâlmân uuccâm nohá kuittâg jo 30.9.2026, muštotteh Sämitige saavâjođetteijeeh. Muštottâs kuáská eromâšávt nuoráid já ulmuid, kiäh iä lah ovdil lamaš vaaljâluvâttâlmist.
– Lii tehálâš, ete sämiaalmug huolât tast, ete mii jieččân nuorah oceh vaaljâluvâttâlmân, iätá Sämitige saavâjođetteijee Pirita Näkkäläjärvi.
Jienâstemvuoigâdvuođâ pyehtih uuccâđ nuorah, kiäh tevdih 18 ihheed majemustáá majemuu vaaljâpeeivi (3.10.2027) já kiäh tevdih jienâstemvuoigâdvuođâ kriterijd. Sijjân vuolgâttuvvojeh muštottâsreeivah vaaljâluvâttâlmân ucâluumeest porgemáánu pelimuddoost.
Ive 2024 sämitiggevaaljâin vaaljâluvâttâlmân merkkejum olmooš ij taarbâš tevdiđ uđđâ uuccâmluámáttuv, peic sun váldoo vaaljâluvâttâlmân ucâmušttáá, jis sun tiävdá vyeimist orroo iävtuid vaaljâluvâttâlmân merkkiimist.
Sämitiggevaaljah pišteh tääl kuttâ oho ovdebái neelji oho saajeest. Vaaljâi algâttem toleduvvoo ovttáin ohhoin. Uđđâ ääigih puátih uđâsmittum sämitiggelaavâst. Vaaljah toimâttuvvojeh poostâ peht tâi tooimâtmáin jienâstemliipu vaaljâlävdikode almottem sajan mudoi ko poostâ peht. Säämist vaaljah toimâttuvvojeh meid vaaljâpeeivi jienâstmáin.
Uuccâmluámáttâh almostui koskoho
Sämitige vaaljâlävdikodde almostitij syeinimáánu 15. peeivi uuccâmluámáttuv vaaljâluvâttâlmân puoh kuulmâ Suomâst sarnum sämikielân sehe suomâkielân. Luámáttâh kávnoo Sämitige vaaljâi uđđâ nettisiijđoin, moh almostuvvii syeinimáánu aalgâst. Luámáttuv lasseen nettisiijđoin kávnojeh eereeb iärrás vuáđutiäđuh sämitiggevaaljâin sehe keevâtliih ravvuuh iävtukkâssáid já jienâsteijeid.
Ucâmuš kalga leđe toimâttum vaaljâlävdikode toimâttâhân majemustáá 30.9.2026 tijme 23.59. Uđđâ meripeivi puátá uđâsmittum sämitiggelaavâst. Oovdeb laavâ ääigi uuccâmäigi vaaljâluvâttâlmân nuuvâi juovlâmáánu majemuu peeivi ovdil vaaljâive älgim.
Vuoigâdvuotâ merkkejuđ vaaljâluvâttâlmân lii muttum
Sämitiggelaahâ uđâsmittui moonnâm ive. Siämmást meid vuoigâdvuotâ merkkejuđ vaaljâluvâttâlmân muttui.
Uđâsmittum já tääl vyeimist orroo sämitiggelaavâ (27.6.2025/414) 3 § mield vuoigâdvuotâ merkkejuđ Sämitige ive 2027 vaaljâluvâttâlmân lii ulmust, kote ana jieijâs sämmilâžžân, toin iävttoin, ete sun jieš teikkâ kuittâg ohtâ suu vaanhimijn, ááhuin, äijihijn teikkâ ááhui já äijihij vaanhimijn lii oppâm sämikielâ vuossâmužžân kiellân.
Ton lasseen Sämitige vaaljâluvâttâlmân merkkim iähtun lii, ete olmooš šadda olesahasâžžân majemustáá vaaljâtoimâttâs majemuu peeivi já ete sun lii Suomâ aalmugjeessân teikkâ sust lii olgoeennâm aalmugjesânin lamaš päikkikieldâlaavâst (201/1994) uáivildum päikkikieldâ Suomâst talle ko ucâmuš vaaljâluvâttâlmân väldimist kalga majemustáá rähtiđ.
Lasetiäđuid sämitiggevaaljâin finnee Sämitige saavâjođetteijein já Sämitige vaaljâlävdikoddeest. Ohtâvuotâtiäđuh kávnojeh Sämitige ohtâvuotâtiätusiijđoin.
Käldee:
– Teháliih peivimereh eromâšávt nuoráid, kiäh tevdih 18 ihheed – Sämitige saavâjođetteijeeh muštotteh valjâluvâttâlmân ucâmist 30.9.2026 räi (samediggi.fi)
Kove: Sämitigge / Ville Fofonoff
Sämitige I värisaavâjođetteijee Leo Aikio, saavâjođetteijee Pirita Näkkäläjärvi já II värisaavâjođetteijee Tuomas Aslak Juuso