Suomâ Sämitigge uásálistij Ovtâstum aalmugij (OA) algâaalmugij vuoigâdvuođâi äššitobdeemekanism (Expert Mechanism on the Rights of Indigenous Peoples, EMRIP) 17. čuákkimân Genevest 8.–12.7.2024. EMRIP lii OA olmoošvuoigâdvuotârääđi išeorgaan. Ton čuákkimáid uásálisteh eereeb iärrás staatâi, algâaalmugij já algâaalmugseervij ovdâsteijeeh.
Jieijâs sahâvuárust Sämitige saavâjođetteijee Pirita Näkkäläjärvi tiäduttij, ete sämitiggelahâiävtuttâs kalga tääl tuhhiittiđ ájáttâlhánnáá.
”Sämmiliih vuoittii jieijâs vaaljâid! Merhâšittee eenâbloho Sämitige uđđâ jesânijn kyeditteh sämitiggelahâiävtuttâs tuhhiittem. Mun avžuuttâm-uv ovdâskode tuhhiittiđ Sämitiggijn ráđádâllum já ovdâskoodán oovtâuáivilist puohtum lahâiävtuttâs ájáttâlhánnáá. Iä lah innig tušes aagah maŋediđ tom”, eeđâi saavâjođetteijee Näkkäläjärvi jieijâs saavâst.
Uáiviminister Petteri Orpo haldâttâs adelij juovlâmáánust 2023 sämitiggelahâiävtuttâs oovtâuáivilist ovdâskoodán. Kuovâmáánust 2024 vuáđulahâváljukodde kuittâg pisánij sämitiggelahâiävtuttâs kieđâvuššâm tassaažân ko sämitiggevaaljah láá uárnejum uđđâsist já uđđâ Sämitigge lii čuákist.
Sämitige anarâš ovdâsteijei kooskâst sämitiggelahâiävtuttâs lii äšši, mii oro jyehimin enâmustáá ovdâsteijei uáinuid. Motomijn iä lah stuorrâ jurduuh laavâst, já motomeh uáinih tast čuolmâid, mut kuittâg tuárjuh iävtuttâs.
Käldeeh:
– Sámediggelága ođasmahttin bisána: Vuođđoláhkaváljagoddi joatká lága gieđahallama easkka ođđa válggaid maŋŋá (yle.fi)
– Saavâjođetteijee Näkkäläjärvi OA:st: Sämitiggelahâiävtuttâs kalga tuhhiittiđ ájáttâlhánnáá – ”Iä lah innig tušes aagah” (samediggi.fi)
Kove: miami car accident lawyers (Pixabay)