Uuccâm ive 2027 sämi­tigge­vaaljâi vaaljâ­luvât­tâl­mân nohá itten

Itten ađai 30.9. lii majemuš peivi uuccâđ puáttee ive sämitigge­vaaljâi vaaljâluvâttâlmân, tieđeet Sämitigge.

Šleđgâlâš luámáttâh kalga leđe šleđgâlávt vuáláčallum majemustáá meripeeivi tijme 23.59. Pävirluámáttâh vist kalga leđe toimâttum vaaljâlävdikode toimâttâhân tâi Saijoos vyeliaula postâloován majemustáá meripeeivi tijme 16.15, kuás toimâttâh mana kiddâ.

Ive 2027 vaaljâluvâttâlmân puáhtá merkkiđ tuše taid ulmuid, kiäh láá uuccâm toos meriääigi räi, teikâ taid ulmuid, kiäh láá kuullâm ive 2024 vaaljâluvâttâlmân já kiäh tevdih uđâsmittum sämitiggelaavâ miäldásijd iävtuid vaaljâluvâttâlmân kulâmist.

Ucâmuš finnee sehe šleđgâlâžžân já printtimnáál luámáttâhhân Sämitige vaaljâsiijđoin. Valmâšin printtejum luámáttuvâid puáhtá finniđ Säämi kulttuurkuávdáš Saijoos aulast talle ko tot lii áávus. Taid finnee meid pivdemáin Sämitige vaaljâlävdikode toimâttuvâst.

Ravvuid ucâmuš tevdimân finnee Sämitige vaaljâšiijđoi Jienâsteijei-uásist. Meiddei vaaljâlävdikode toimâttâhân puáhtá väldiđ ohtâvuođâ, jis occest lii ovdâmerkkân čuolmân finniđ ucâmušân tárbulijd lahtosijd ovdil meriääigi. Toimâttuv ohtâvuotâtiäđuh kávnojeh Sämitige tiäđáttâsâst.

Käldee:
– Uuccâm ive 2027 sämitiggevaaljâi valjâluvâttâlmân nohá 30.9.2026 (samediggi.fi)

_{Kove: Sämitigge}