Suomâ almai tuáškumpállueennâmjuávkku vuoitij lávurduv EM‑proonsi Slovenia vuástá. Koččâmušâst lii Suomâ vuossâmuš rävisulmui árvukištomiitaal tuáškumpáálust.
Suomâ miitaaljuávkun uárnejuvvojeh onne vuossaargâ aalmugjuhleh Tampere Kuávdáštorist. Juhleh älgih tijme 17.30, já taid puáhtá čuávvuđ meiddei Ylest tijme 18 rääjist.
Suomâ päälgis mitaláid
Suomâ speelâi turnaamist oovce spellâd, main tot vuoitij čiččâm.
Vuosmuid vittâ speelâ Suomâ speelâi Tamperest. Tain Suomâ vuoitij Tanska, Belgia, Serbia já Vuáládâhenâmijd. Majemuš spellâ Viro vuástá nuuvâi táápun.
Kávcádâsfinalijn já niäljádâsfinalijn uási spiällojii Sofiast Bulgariast, uási vist Torinost Italiast. Suomâ speelâi jieijâs speelâid Italiast.
Kávcádâsfinalijn Suomâ vuoitij Kreika 3–2. Niäljádâsfinalijn Suomâ finnij eromâš korrâ háástu, ko tom vuástá poođij jieijâs päikkikeččei oovdâst Italia, mii lii vuáittám kyehti oovdeb maailmmiäštárvuođâ. Italia lâi viiđâd ađai majemuu uásist njunošist 11–8, mut Suomâ luhostui vyeittiđ tom 13–15. Spellâ nuuvâi 2–3 Suomâ pyerrin.
Puoh majemuuh speelah spiällojii Milanost Italiast. Pelifinalijn Suomâ táppái Raanskan 1–3, ko vist Slovenia táppái Puolan 0–3.
Majemuin kuulmâ EM‑kištoin Slovenia lâi vuáittám oovtâ proonsi (2023) já kyehti siilbâ (2021 já 2019). Taan tove eennâm paasij ollásávt mitalijttáá, ko Suomâ vuoitij tom pronssispeelâst čielgâsávt 3–0 (25–23, 25–20, 29–27). Puola ruvnájui Euroop miäštárin.
Käldeeh:
– Veljekset teki mitalihistoriaa – EM-pronssia (www.lentopallo.fi)
– Puolan lentopallomiehet kaatoivat Ranskan ja uusivat Euroopan mestaruutensa (yle.fi)
– Lentopallon kansanjuhla Tampereella maanantaina – tule juhlimaan historiallista EM-pronssijoukkuetta (www.lentopallo.fi)
Kove: Euroop tuáškumpállulitto CEV