Ruotâ uástá Himars-rakkeet­päččee­systeem Ovtâs­tum staatâin, Suomâ suápá huolât­tâs­ohtsâš­pargoost Ruotáin

Ruotâ lii meridâm haahâđ ameriklii Himars-rakkeetpäččee­systeem. Uástus árvun lii almottum paijeel čiččâm miljard Ruotâ ruvnâd, ađai nyevt 630 miljovn eurod.

Ruotâ piäluštâsvuoimijn iä ovddiist lah siämmáálágáneh systeemeh, nuuvt et eennâm lii sooppâm ohtsâšpargoost Suomáin. Suomâst láá aanoost amerikliih MLRS-rakkeetpäččeeh, moh kevttih siämmáid rakettijd ko Himarseh. Ruotâ finnee kevttimnáál Suomâ tiätutááiđu lusis rakkeetpäččein. Enâmij piäluštâsministereh vuáláčaalijn čohčâmáánu 7. peeivi rakkeet­päččee­ohtsâš­paargon kyeskee aaigâsopâmuš.

Huolâttâskuávdáš anon Suomâst

Suomâ áigu išediđ Ruotâ škovlim, huolâttâs já teknisii paijeentoollâm tááhust.

– Mij uážuim tolebáá taan ive visásmittiđ Suomân tai systeemij paijeentoollâm- já huolâttâsnaavcâi huksim. Ko Ruotâ tääl váldá anon oohtânsuáppee rakkeetpäččee­systeem, te kuohtuuh enâmeh uážžuh laseáárvu tast, ete taat uási lii mist jo valmâšin, piäluštâsminister Antti Häkkänen iätá.

Häkkänen uáivild Tamperen vuáđuduvvee, Euroop vuossâmuu lusis rakkeetpäččei huolâttâs- já paijeentoollâm­kuávdáá, mast soppui kesimáánust ameriklijn viärju­ráhtálâš­vuotâ­konsernáin Lockheed Martináin.

Piäluštâsminister Häkkänen iätá Ylen, et Suomâ viggá toos, et nuuvt maaŋgah enâmeh ko máhđulâš kuávdásmitáččii jieijâs huolâttâs Suomân.

– Já tääl Ruotâ lii vuossâmuš eennâm, mii vuálgá taas. Tot nannee mii piäluštâs­ráhtálâšvuođâ já lasseet teknologisii máátu tain rakkeetpäččein. Tot lii meiddei syemmiláid irâttâssáid pyeri äšši, Häkkänen iätá.

Häkkänen: Ruotâ tullâ­vyeimi iššeed Suomâ

Piäluštâsminister Antti Häkkänen iätá, et ohtsâšpargo já Ruotâ uđđâ rakkeetpäččeeh pyeredeh Suomâ já ubâ Tave-Euroop torvolâšvuođâ.

Natost piäluštâs sundáttâlloo puoh jeessânstaatâi resursijguin. Suomâst láá jo váhá paijeel 40 lusis rakkeetpäččed, já tääl Ruotâ Himarseh pyehtih lasetorjuu kuávlu piäluštâsân.

– Loopâloopâst tyehiliinjá enâmij resurseh kiävttojeh ovdâliinjá enâmij piäluštmist, nuuvt ete Ruotâ haahâm merhâšittee tullâvyeimist lii ävkki Suomân, Häkkänen paahud.

Tave-enâmijn piäluštâs­ohtsâšpargo lii majemui aaigij vijđánâm ovddiist. Porgemáánu loopâst Suomâ já Ruotâ soováin ohtsâšpargoost Suomâ kuoskâhánnáá­vuođâ kocemist.

Käldee:
– Ruotsi ostaa Himars-raketinheitin­järjestelmän, Suomi sopi huolto­yhteistyöstä – ”Ruotsin tulivoima hyödyttää Suomea” (yle.fi)

_{Kove: Ovtâstum staatâi suátiviehâ}