Sämmilii Julla Májja ‑kirjerájuauto toimâ Ruotâst lii finnim fastâ ruttâdem maaŋgâ ive epivisesvuođâ maŋa. Tääl Storuman (ummeesämikielân Lusspie) kieldâ lii lopedâm ruttâdiđ tooimâ, jis kieldah Västerbotten sisenâmist juátkih ruttâdmân uásálistem.
Storumanist šadda kirjerájuauto vuolgâ- já toimâsaje puáttee ive aalgâst. Julla Májja toimâjođetteijee Nadja Grundström Fjellner muštâlij Tave-enâmij Säämi TV‑uđđâsijn, ete taat oro rievtisin, tastko Julla Májja ‑kirjerájuauto toimâ vuolgij algâalgâlávt-uv joton Storumanist ive 2021.
Kirjerájuauto tooimâi kuhháá haahhân, mii kuittâg nuuvâi ive 2025. Kuhháá lâi epičielgâs, maht tooimâ puávtáččij ruttâdiđ puátteevuođâst.
Forgâ ulmen lii uástiđ meid uđđâ, stuárráb auto, olmâ buusi tááláá pakkeetauto sajan. Ruotâ kulttuurrääđi lii mieđettâm tooimân ohtsis kulmâ miljovn ruvnâd (suullân 265 000 eurod). Grundström Fjellner tuáivu, ete kirjerájubuusist šadda jottee teivâmsaje, kost sämmilâšvuotâ lii normâ.
Käldee:
− Girjebusse Julla Májja joatká – Luspie váldá badjel (www.svt.se)
Kove: Lukas Riebling (CC BY-SA 3.0 / Wikimedia Commons)