Sämmilij Julla Májja -kirjerájuautotoimâ nohá Ruotâ Vilhelminast. Vilhelmina kieldâ lii kiäsádâttâm kirjerájuautohaavâst kieldâ hiäjus ekonomisii tile keežild. Sämmilâš kirjerájuauto lii V8-kirjeráájui já Västerbotten siseennâm kuávlu käävci kieldâ ohtsâšhaahâ.
Ive 2021 rääjist Julla Májja lii toimâttâm kiirjijd já eres kulttuurfalâlduv käävci Västerbotten siseennâm kuávlu kieldân. Tot lii lamaš tehálâš toimâ eromâšávt škovláid já puárásijviäsuid tagarijn kuávluin, kost kooskah láá kuheh. Tooimâ ulmen lii nanodiđ sämikulttuur, sämmilii identiteet já kirjerájutooimâ. Tot lasseet kirjeráájui juksâm sämmiláid sehe puohháid, kiäh láá kiddiistum sämmilii kirjálâšvuođâst já kulttuurist. Kirjerájuautotooimâst lii meid tehálâš roolâ tiäđui leevâtmist sämikulttuurist válduaalmugân.
Eenâb ko tuše kirjerájuauto
Julla Máijja lii kuittâg eenâb ko tuše kirjerájuauto. Tot lii kuččum meid sämikulttuurbussin. Bussi lii kollim škoovlâin já puárásijviäsuin, já ton siste láá uárnejum savâstâlmeh puásuituálust já mielâtiervâsvuođâst. Motomin kirjerájuautost láá lamaš fáárust sämmiliih čälleeh. Juurdân lii tot, ete kirjerájuauto falâldâh kolgâččij leđe viijđes, já ete bussi kolgâččij leđe siämmást meid ulmui teivâmsaje. Julla Máijja ulmen lii leđe sämibussi, ij ruátálâš bussi, kost láá sämmiliih kirjeh.
Tooimâst láá puáttám palhâšumeh-uv. Ive 2023 Julla Májja uážui Ive jottee kirjerááju- palhâšume, mon juovij Ruotâ kirjerájulitto. Moonnâm ive vist kirjerájuauto vuoitij Ruotâ kirho sämirääđi kulttuurpalhâšume.
Ton lasseen, ete sämmilâš kirjálâšvuotâ ij lah innig siämmáá älkkest finnimnáál Vilhelmina ässeid, Vilhelmina kieldâ kiäsádâttâm haavâst meerhâš meid ucceeb ruuđâ ubâ haahân. Lii vala epivises, maht Vilhelmina miärádâs vaaigut kirjerájuauto tooimân eres kieldâin.
Käldeeh:
– Stopp för Julla Májja i Vilhelmina: ”Bedrövligt” (www.svt.se)
– Vilhelmina har hoppat av Julla Májja – ”Bedrövligt” (www.biblioteksbladet.se)
– Julla Májja (www.v8biblioteken.se)
– Julla Májja – ett bibliotek på hjul som stärker kultur och identitet (www.vgregion.se)
Kove: Hanna Liljekvist, Destination South Lapland (Wikimedia Commons)