Ovtâstumstaatâlâš čurmâdâtteelegenda já oovdiš lusis tiädduluoka miäštár George Foreman lii jáámmám 76-ihásâžžân. Sun jaamij njuhčâmáánu 21. peeivi.
Foreman vuoitij kole ive 1968 kesiolympialijn Meksikost. Lusis tiädduluoka miäštárin sun šoodâi ive 1973, kuás sun vuoitij Joe Frazier Kingstonist Jamaikast. Foreman piäluštij miäštárvuođâs kuohtii, mut ive 1974 sun táppái Muhammad Alin historjálii ”Rumble in the Jungle” -čurmâdâttâmkištoost Kinshasast tallaa Zairest, mii lii taan ääigi Kongo demokraatlâš täsiväldi.
Ive 1977 Foreman jooskâi kištottâlmist já porgâškuođij särnideijen Hiärrá Jeesus Kristus kirhoost (eŋg. Church of the Lord Jesus Christ) Texasist. Sun meid vuáđudij nuorâikuávdáá.
Love ihheed maŋeláá Foreman maacâi kištottâllâđ, vâi sun finniiččij lase ruuđâ jieijâs nuorâikuávdážân. Sun vuoitij miäštárpuáhháá nube keerdi ive 1994 Michael Moorer vuástá 45-ihásâžžân. Návt Foremanist šoodâi puárásumos lusis tiädduluoka miäštár čurmâdâttâm historjást. Foreman kištottâlâi majemuu keerdi ive 1997. Áámmátlii karrieersis ääigi sun vuoitij 76 kištod já táppái vittii.
Käldeeh:
– Nyrkkeilijälegenda George Foreman on kuollut (yle.fi)
– George Foreman, heavyweight champ and purveyor of grills, dies at 76 (www.reuters.com)
– Heavyweight boxing legend George Foreman dies aged 76 (www.bbc.com)
Kove: el grito (Wikimedia Commons)