Tšeeki maadâviestâruásist leijee Brdy luándusuojâlemkuávlun lâi vuávájum puáđu huksim jo ive 2018 rääjist, vâi njeeši tile puáráničij. Tovle kuávlu cuáhudui Tšeeki piäluštâsvuoimij kiävtun. Loopâst puáđu huksiimân mieđettui 30 miljovn Tšeeki ruvnâd ađai suullân 1,2 miljovn eurod. Luándusuojâlemkuávlu já Vltavajuuvâ virgeomâhááh lijjii eidu ráđádâlmin huksimluuvijn já eres puáđu huksiimân lohtâseijee byrokratiast, ko puáđuhaahâ paifakkist koskâldui.
Páiháliih maijuuh lijjii porgâm jo ubâ pargo. Tuše kyevti peeivi siste olmâ sajan lâi ittáám maaijuvpuáđu – luvijttáá já byrokratiattáá.
”Maaijuv pasta huksiđ puáđu oovtâ iijâst, enâmustáá toos maneh kyehti iijâ”, elleetotkee Jiří Vlček čielgij tšekkilii ČT24-uđâskanavan. Sun arvâl, ete puáđu huksiimân kuáivummašináin ličij moonnâm suullân okko.
Kuávlust áásá aainâs-uv ohtâ maaijuvpeerâ, moos kuleh suullân käävci maijuvid.
Pirâssuojâleijeeh láá tärhistâm puáđu, já sij ettii, ete maijui huksim puáđuääldis fáálá šiev máhđulâsvuođâid eres-uv njeeši ässeid, tego cuobbuid já rapuid, iälustiđ taan kuávlust.
”Maijuuh tietih ain pyeremustáá. Sajeh, kuus toh huksejeh puáđuid, väljejuvvojeh ain tárkká. Pyerebeht ko mij pastaččijm pááppár alne vuáváđ”, muštâl Jaroslav Obermajer Tšeeki luándusuojâlemtoimâttuvâst.
Käldeeh:
– Majavaperhe rakensi miljoonien hintaisen padon parissa päivässä (www.hs.fi)
– Päättäjät suunnittelivat patoa 7 vuotta – majavat hoitivat homman parissa päivässä (www.is.fi)
Kove: Ralf Schick (Pixabay)