Sisministeriö lii mieđettâm Laapi pyereestvaijeemkuávlun 500 000 euro ruttâdem, moin tuárjoo piäluštâshelikopter Aslak toimâ.
Lapin Pelastushelikopteri Aslak ry, mii fáálá Aslak palvâlusâid, ferttij koskâlduttiđ tooimâ mottoom puudân keessiv ruttâdemháástui keežild. Táválávt Aslak toimâkoloh láá suulân 1,7 miljovn eurod. Servi skáppoo ruuđâid jieš. Moonnâm ive seervist paasij finniihánnáá paijeel 300 000 eurod sisministeriö ruttâdem. Taaijuv ruttâ tarbâšui vala suulân 500 000 eurod, mon sisministeriö sierânâsruttâdem lii tääl turvâstâm.
Piäluštâslaavâ mield staatâ puáhtá uásálistiđ piäluštâstooimâ kiärgusvuođâ paijeentolâmân, jis tot lii eromâš suujâ tiet ulmemiäldásâš. Vyevih taas láá eromâškálvuduv skappum já tooimâ ruttâdem. Ruttâdem mieđettuvvoo sisministeriö budjetist.
Laapist helikopterij kevttim piäluštâstooimâst lii veltimettum, tastko kooskah láá kuheh, luodah láá häärviht, jotteem lii väädis já piäluštâstooimâ palvâlemkuávlu lii viijđes. Helikoptereh kiävttojeh ovdâmerkkân uuccâm‑ já piäluštâstooimâin sehe poolis jođettem uuccâm‑ já virgeišetooimâin.
Laapi pyereestvaijeemkuávlust virgeomâhái helikopterij kiärgusvuotâ tievâsmittoo sopâmušâiguin. Lapin Pelastushelikopteri Aslak ry lasseen palvâlusâid láá faallâm helikoptereh Taažâ peln.
Servi haalijd fastâ ruttâdem
Lapin Pelastushelikopteri Aslak ry ruttâtuálu lii vaigâdis tiileest. Seervi toimâ lii iänááš ruttâdum ulmui já seervij torjuin. Seervi mielâst taat ij lah kuittâg pyeri kuhesáigásâš čuávdus. Siämmáá uáivilist lii meid piäluštâspajehovdâ Kimmo Kohvakka, kiäm servi sahhiittâlâi Aslak puátteevuođâ háárán čohčâmáánust.
Servi lii-uv porgâm aktiivlávt ton oovdân, ete Aslak toimâ finniiččij pisovub sajattuv virgálii piäluštâsvuáháduvvâst. Eres lasseen servi lii teivâm sisminister Mari Rantasáin porgemáánust. Lapin Pelastushelikopteri Aslak ry tuáivu, ete tot finniiččij taggaar ruttâdem, mii tuurvâst seervi tooimâ jotkuuvâšvuođâ.
Käldee:
– Sisäministeriöltä 500 000 euron erillisrahoitus Lapin pelastushelikopteritoiminnan valmiuden tukemiseksi (www.lentoposti.fi)
Kove: Markus Säynevirta (Wikimedia Commons)