Staatârääđi lii meridâm kiddiđ meid Kuáccám, Sala já Vartius rääjirastaldittemsoojijd nuorttârääji alne vástuppeeivi 24.11.2023 tijme 00.00 rääjist. Puoh nuorttârääji rastalditmeh tábáhtuveh Räji-Joovsep rääjirastaldittemsaajeest. Äšši meridui 22.11.2023 staatârääđi paijeelmiärálii čuákkimist. Miärádâs lii vyeimist 23.12.2023 räi.
Enâmân siisâpuáttim Suomâ nuorttârääji alne lii jotkum ovdebáin raijiittâsâin huolâhánnáá já vijđánâm meid eres rääjirastaldittemsoojijd. Haldâttuv já virgeomâhái áárvu mield koskâomijgijn enâmânpuáttim Ruošâst já ton vijđánem tovâtteh stuorrâ uhke aalmuglii torvolâšvuotân já almolii oornigân.
Räjikosáttuv já eres virgeomâhái aiccâmij já toi finnim tiäđui mield lii čielgâs, et vieres staatâ virgeomâháin já eres tuáimein lii uási rääji rastaldittám ulmui iššeedmist Suomân pesâmist. Koččâmuš lii almonist, mon Ruošâ virgeomâhááh syevih já spiehâsteh ovdebáin vuovijn. Toos lohtâs meid aalmugijkoskâsâš rikolâšvuotâ.
Suomân láá porgemáánu rääjist puáttám suullân 700 kuálmád eennâm ässed viisumttáá nuorttârääji rääjirastaldittemsojij peht. Taah ulmuuh láá áánnum torvosaje Suomâst.
Puoh nuorttârääji rastalditmeh kuávdásmittojeh Räji-Joovsepân
Suomâ já Ruošâ nuorttârääji rastalditteeh kalgeh kevttiđ Räji-Joovsep rääjirastaldittemsaje nuuvt kuhháá ko miärádâs lii vyeimist. Aalmugijkoskâsii suojâlem uuccâm ij lah máhđulâš eres saajeest Suomâ já Ruošâ koskâsii eennâmrääji alne.
Miärádâs vuáđuduvá räjikosáttâhlaahân
Räjikosáttâhlaavâ 16. ceehi mield staatârääđi puáhtá meridiđ rääjirastaldittemsaje kiddiimist merikoskâsávt teikâ tuáistáážân, jis kiddim lii velttidmettum almolii oornigân, aalmuglii torvolâšvuotân teikâ aalmugtiervâsvuotân kyeskee uhke tuástum keežild. Staatârääđi puáhtá táárbu mield meid meridiđ aalmugijkoskâsii suojâlem kuávdásmitmist oovtâ teikâ maaŋgâ rääjirastaldittemsajan.
Staatârääđi čuávu nuorttârääji tile ohtsâšpargoost virgeomâháigijn. Miärádâs macâttuvvoo teikâ nubástittoo, jis tile muttoo.
Käldee:
– Suomi sulkee lisää rajanylityspaikkoja (valtioneuvosto.fi)
Kove: kallerna (Wikimedia Commons)