Staatârääđi meridij koskoho 16.4. toollâđ kiddâ puoh Suomâ nuorttârääji räjijotteemsoojijd. Tot meridij meid aalmugijkoskâsii suojâlem kuávdásmitmist. Taat miärádâs lii vyeimist tuáistáážân. Staatârääđi miärádâs rajij kiddâtolâmist lii lamaš vyeimist siämmáin siskáldâssáin pajeláhháá ive. Sisministeriö tiäđáttâsâst muštâluvvoo, et lâi vuáđuštâllum, et staatârääđi árvuštâlâi uđđâsist tijmáá miärádâs siskáldâs já ton toimâiävtuid. Uđđâ miärádâssáin komettui 4.4.2024 tohhum staatârääđi miärádâs.
Suomâ já Ruošâ eennâmrääji räjijotteemsajeh láá lamaš kiddâ juovlâmáánu 15. peeivist 2023 staatârääđi miärádâssáin. Aalmugijkoskâsii suojâlem uuccâm lii kuávdásmittum Suomâ kirdem- já čäcijotoluv räjijotteemsoojijd. Majemužžân já áinoo räjijotteemsaijeen Suomâ já Ruošâ kooskâst lâi áávus Räji-Joovsep juovlâmáánust 2023. Ton kiddim maŋa puoh räjijotteemsajeh láá lamaš kiddâ.
– Nuuvt kočodum räjitorvolâšvuotâlaavâ aasâtmáin lii juksum tain halijdum vaiguttâs, ađai skammâmáánust 2023 álgám lavâttes enâmânpuáttim Suomâ nuorttârääji alne lii orostâm. Lavâttes enâmânpuáttim lii ohtâ Ruošâ vuovijn äštiđ já vaiguttiđ Suomâ já EU torvolâšvuotân já ohtsâškodálii stäđisvuotân, sisministeriöst iättoo.
Ministeriö almoot, et Suomâ virgeomâhái tiäđui vuáđuld uhke siämmáá almonem kiärdášuumist já vijđánmist lii tuođânálásâš. Jis tot jotkuuččij, te tot uhkedičij merhâšitteht Suomâ aalmuglii torvolâšvuođâ já almolii oornig enâmist.
– Staatârääđi árvuštâl miärádâs siskáldâs já tooimânpieijâm merikoskâsávt oovtâst Räjikocceemlágádâssáin já eres virgeomâháigijn ton mield ko tile tom váátá. Miärádâs komettuvvoo teikâ nubástittoo, jis tot ij lah innig págulâš aalmuglii torvolâšvuotân teikâ almolii oornigân kyeskee uhke tuástumân, sisministeriö tieđeet.
Käldee:
– Itaraja pysyy kiinni toistaiseksi (valtioneuvosto.fi)
Kove: Marja-Liisa Olthuis