Staatârääđi lii meridâm, et Suomâ já Ruošâ eennâmrääji räjijotteemsajeh pisoh kiddâ 11.2.2024 räi. Aalmugijkoskâsii suojâlem ij pyevti uuccâđ Suomâ já Ruošâ koskâsii eennâmrääji rastaldittemsoojijn. Ääšist meridui staatârääji čokkáánmist 11.1.2024.
Staatârääđi meridij 14.12.2023 Suomâ nuorttârääji räjijotteemsojij koskâpuddâsii kiddiimist mánuppajan já aalmugijkoskâsii suojâlem uuccâm kuávdásmitmist. Tánávt viggui toos, et Suomâ nuorttârääji alne tábáhtuvvee patâreijeevirde orostičij.
– Virgeomâhái čokkim tiäđui vuáđuld uhke Ruošâ hybridvaiguttem jotkuumist já ton vijđánmist lii kuittâg tuođâlâš. Tondiet lii velttidmettum juátkiđ nuorttârääji kiddim, čielgee sisminister Mari Rantanen.
Uhke koskâuámittum enâmânpuáttim jotkuumist nuorttârääji alne toovât stuorrâ uhke aalmuglii torvolâšvuotân já meiddei almolii oornigân Suomâst. Virgeomâhái mield lii čielgâs, et enâmânpuáttim lii tábáhtum Ruošâ virgeomâhái teikâ eres tuáimei vaiguttâsâst. Almoonmân lohtâs meid aalmugijkoskâsâš rikolâšvuotâ.
Virgeomâhái čokkim tiäđui mield aldakuávlust láá ain enâmânpuátteeh vyerdimin nuorttârääji lekkâsem. Ulmuuh láá meid ain perustum vyelgimist vuolgâenâmijn.
Staatârääđi árvuštâl miärádâs siskáldâs já vijđoduv tiätu äigikooskâi já čuávu tile muttum já ovdánem. Miärádâs komettuvvoo teikâ tot muttoo, jis tot ij lah innig velttidmettum aalmuglii torvolâšvuotân teikâ almolii oornigân kyeskee viärráás uhke tuástumân. Sisministeriö seelvât meid muulsâiävtuid patâreijeevirde orostitmân.
Käldee:
– Suomen itäraja pysyy kiinni (valtioneuvosto.fi)
Kove: Marja-Liisa Olthuis