Islandist, Grindavík taavaabeln, lii oppeet rusoškuáttám tullâvääri. Grindavík evakuistui pasepeeivi vuástásii iijâ suullân kuulmâ ääigi. Kaavpugist lijjii evakuistem ääigi oromin suullân 200 olmožid. Evakuistem lii moonnâm pyereest já puohah láá torvoost.
Russoomsaje kuáttá lii arvâlum, et tot lii Hagafell-nommâsii vääri maadânuorttiibeln. Magma lii čoggâšum nyevt 15 kilomeetter kukkosii eennâmškovvoos luoddânmân. Tot jotá siijdâ vyelni já uulât eennâmškovosân merâpone vuoluubel. Taat kuávlu lii lamaš vulkaanlávt aktiivlâš ive 2021 rääjist.
Taan tove laava kolgá Grindavík kulij, já tot lâi vistig čuođij meetterij keččin Grindavík tavemuin tááluin. Tot juuvsâi tađe vuástá huksejum estuid, já tot kulgâškuođij estui kuohtui pelij.
Pasepeeivi ovdil oovtâ páihálii ääigi Grindavík aldasijn lekkâsij nubbe russoomluoddânem. Ton maŋa laava juuvsâi tááluid, já jo kulmâ táálu láá pááccám laava vuálá já puállám.
Vulkanolog Þorvald Þórðarson mield uđđâ luoddânem lii muttám tile ollásávt. Sun muštâl, et luoddânem robdâ lii tuše 50–100 meetter keččin kaavpugist. Luoddânem lii suullân 150 kukkosâš, já tast kolgá laava.
– Mun tuáivum, et luoddânem láppoo, mut koččâmuš lii tuše muu tuoivust, sun čielgee.
Meid Grindavík pormiäštár Fannar Jónasson mield tile oro lemin viärráá.
– Tile lii aaibâs nubbe ton maŋa, ko luoddânem šoodâi, sun čielgee. Áášán ij pyevti porgâđ maiden, sun iätá. Meid ässeeh eteh, et sij pyehtih tuše keččâđ tile kukkeláá, ige luánduvuoimijd vaje maiden.
Siiviilpiäluštemhovdâ Víðir Reynisson mield russoomluoddânem muttá merhâšitteht siiviilpiäluštâsvuáváámijd. Reynisson iätá, et lii čuuvtij tehelâš, et kihheen ij moonâ russoomsaje aldasáid.
Taat russoom lii jo viiđâd vuálá kuulmâ ive ääigi.
Käldeeh:
– Islannin tulivuorenpurkauksessa laava syönyt kolme taloa – ”musta päivä koko Islannille” (www.is.fi)
– Islannin tulivuorenpurkaus näyttää tasaantuneen (www.is.fi)
– Tulivuori purkautuu Islannissa: laava saavutti rannikkokaupungin ja sytytti taloja palamaan (www.hs.fi)
Kove: Icelandic Meteorological Office (Wikimedia Commons)
