Mahtsun kooripállujuávkku Utah Jazzân lii keevvâm? Lauri Markkanen čielgee, mondiet juávkku vuáittá tääl NBA njunošjuávhuid

Taan spellâmpaje aalgâst Utah Jazz lâi ohtâ NBA hiäjumuin juávhuin. 15 majemuu speelâst tot lii kuittâg lamaš ubâ NBA-säärji kuđâdin pyeremus. 

Utah Jazz lii kuulmâ majemuu speelâst vuáittám tagarijd juávhuid ko Philadelphia, Milwaukee já Denver, moh taan spellâmpaje láá piergim hirmâd pyereest já láá kievrâs särjivyeitteeiävtukkâsah. 15 majemuu speelâst Utah Jazz lii vuáittám 11. 

Spellâmpaje aalgâst tile lâi nubij kejij. Mánuppaje tassaaš juávkku lâi NBA-säärjist saajeest 25. Talle Utah Jazz lâi vuáittám 7 spellâd já táppám 16.

Ohtâ juávhu stuárráámuin taasnijn lii Lauri Markkanen. Sun lii tuđâvâš majemui aaigij puátusáid. ”Juávkku lii kavnâmin jieijâs identiteet kiedi kuábbáá-uv keejist. Mij ávhástâllâp jieččân kievrâvuođâiguin já mij spellâp oovtâst ohtân juávkkun”, smiättá Markkanen Denver-speelâ maŋa. Utah Jazz vuoitij Denver čuággáiguin 124–111. Markkanen raahtij 26 čuággád. 

Spellâmpaje aalgâst Utah Jazz monâttij páálu hirmâd älkkest. Páálu moonâtmeh láá tääl kiäppánâm. Markkanen haalijd rammuđ juávkkuskipárijdis. Suu mielâst lii tehálâš, ete puohah tietih, kiäh láá spellâmin já maid juávkku haalijd kiedist porgâđ. 

”Mij išedep kuáimán, jis nubbe taarbâš iše. Puohah finnejeh ennuv jiešluáttámuš, ko pállu liihâd volliittemkeejist”, Markkanen rámmoo Denver-speelâ. 

”Spellâm ij lah tot, ete ij addel páálu spellâmskipárân ollágin já spiällá ohtâ oovtâ vuástá. Spellâmpaje aalgâst mij poorgâim nuuvt liijkás-uv ennuv, já puáđus lâi ton miäldásâš”, Markkanen iätá. 

Juovlâmáánu pelimudo räi Utah Jazz monâttij páálu koskâmiärálávt masa 18 kerdid jyehi speelâst. Majemui 15 speelâ ääigi vuod meeri lii lamaš koskâmiärálávt 14 kerdid. Ko páálu ohtuunisjođettem lii kiäppánâm, te lii lamaš älkkeb teivâđ koorijd. 

”Mii kievrâvuotâ lii tot, ete mij spellâp ohtân juávkkun. Mij lihâttep páálu já lihâdep aktiivlávt”, Markkanen tiäddut. 

Meiddei piäluštem lii puáránâm. Utah Jazz nuuvt kočodum ”defensive rating” lâi ubâ NBA-säärji viđâdin hyenemus. Markkanen čielgee, ete piäluštem iššeed vollitmist. 

”Ko mij pyehtip orostittiđ volliitteijeid, te mij jiejah peessâp kaččâđ kiedist. Já piäluštemhân lii váddásumos äšši NBA:st”, sun paahud. 

Veikkâ juávhust lii moonnâm pyereest, te ij Markkanen vala puátteevuođâ smietâ. ”Na, mij väldip oovtâ peeivi häävild”, sun iätá. 

Daniel Nicolás Heinimaa

Käldee:

– Mitä ihmettä Utahissa on tapahtunut? Lauri Markkanen avaa Ylelle, miksi rämpinyt seura voittaa nyt NBA:n huippujoukkueita (yle.fi)

Kove: Colin Hooten (Wikimedia Commons)

Kommenteh

Čääli komment

Kirjoita kommenttisi!
Kirjoita nimesi tähän

Luuvâ meid

Uđđâsumos uđđâseh

Ovtâstum staatâi senatist láá tollum sosiaallii media jođetteijei koijâdâlmeh sosiaallii media vaikuttâsâin nuorâi torvolâšvuotân

Uđđâivemáánu 31. peeivi Ovtâstum staatâi seenaat ađai pajemuu ovdâskode lahâváljukodde koijâdâlâi sosiaallii media vuáháduvâi toimâjođetteijeid. Fáddán lâi vyeliahasij seksuaallâš puástukevttim já ávhástâllâm, mii sosiaallii...

Måneskin puátá vuosmuu tove Suomân

Italialaš rock-muusikjuávkku Måneskin puátá vuosmuu tove Suomân puáttee keesi. Muusikjuávkku láávdást Seinäjokist Provinssi-festivaalist kesimáánu 27. peeivi. Muusikjuávkku lii makkuuttâm keččeid pirrâ maailm, já sii...

Áávus ry viggá orniđ tuárispeln perruid astoäigitooimâ

Ive 2022 keessiv vittâ eeni čokkânii Anarist. Sist puohâin lijjii sämikielâliih párnááh já sij suogârdii vuovijd faallâđ párnáidis astoäigitooimâid sämikielân. Sij meridii vuáđudiđ tađe...

Sambialii irâttâsâst, mii uážui ovdedemiše Suomâst, kavnui pärnipargovyeimi

Sambialii irâttâsâst, mii uážui ovdedemiše Suomâst, kavnui pärnipargovyeimi. Irâttâs omâsteijee Lwenga Mulela mieldi koččâmâš ij lah pärnipargovyeimist tondiet ko párnáid ij lah maksum pälkki....

WWF lii kulluuttâm saimaanuárjoid pessimráávhu lasanem várás

Saimaanuárju lii nuárjušlaajâ, mii iälá tuše Suomâst. Tot lii uáli uhkevuálásâš. Saimaanuárjuh lasaneh kuovâ- teikâ njuhčâmáánust. Nuárjučiivgah šaddeh muotâpiäjust, mon niŋálâs lii kuáivum. Lii...