Taažâ uđđâ kunâgâs Haakon VIII lii vuárnum kunâgâsvuárnásis eennâm parlamentist Stortingetist Oslost majebaargâ tijme 13 páihálii ääigi. Parlamentist adelum vyernis lii uási uđđâ kunâgâs viirgánlavkkimprosesist. Taažâ ij ornii uđđâ kunâgâsân ruvnájáid. Taat ärbi lopâttui jo ive 1908.
Vuárnásist kunâgâs Haakon VIII lopedij nuávdittiđ Taažâ laavâid já vuáđulaavâ. Seremonia piištij nyevt 17 minuttid. Tilálâšvuođâst lijjii fáárust suu perrust ruvnâprinses Ingrid Alexandra, prinssâ Sverre Magnus já roonnig Sonja. Roonnig Mette-Marit ij uásálistám tilálâšvuotân tiervâsvuotâčuolmâi keežild.
Haakon lii váldám anon tobdosciälkkámuš Puoh Taažâ peeleest. Taam ciälkkámuš láá kiävttám meid ovdil suu vääldist lamaš kunâgâsah.
Haakonist šoodâi uđđâ kunâgâs moonnâm vástuppeeivi suu eeji Harald V jäämmim maŋa. Harald V kiergânij leđe Taažâ kunâgâssân 35 ihheed. Sun jaamij moonnâm vástuppeeivi 89‑ihásâžžân.
Meid Taažâ ruvnâprinses Ingrid Alexandra vuárnui vuárnásis čohčâmáánu 1. peeivi kirjálávt. Ingrid Alexandra kirjálâš vuárnum lohtâs toos, et sun lii tääl Taažâ ruvnâárbálâš já et sun puáhtá toimâđ eejis sajasâžžân, jis taat lii estum toimâđ kunâgâssân. Sun lii meid Taažâst vuosmuš ruvnâárbálâš, kote lii juovdâm rävisulmuu ahan jo talle ko suu vaanhimist šadda kunâgâs.
Käldee:
– Avla sin ed til Grunnloven (www.kongehuset.no)
Artikkâlkove: Anette Ask / Taažâ kunâgâshovi