Suomâ säämi eromâškirjerááju algâttij onne luuhâm- já medialuuhâmháástu sämikielâláid nuoráid. Lohkan+ Luuhâm+ Lookkmõš+ ‑hástu lii uáivildum 13–29-ihásáid, já toos puáhtá uásálistiđ mon peri sämikielân já kost peri.
– Háástu ulmen lii pajediđ uáinusân sämikielâg media maaŋgâpiälálâšvuođâ já movtijdittiđ kevttiđ sämikielâlii media aargâst, muštâl Karoliina Harvala Suomâ säämi eromâškirjeráájust.
Háástust uásálisteeh čođâlditeh jieškote-uvlágánijd luuhâm- já mediapargopittáid já viggeh tevdiđ oles raddalâs biiŋon. Luuhâmpargoi lasseen hástu siskeeld eereeb iärrás muusik kuldâlem já čäällim.
– Sämikielâlii mediafalâldâhân kulá meiddei njálmálâš ärbivyehi, tego juoigâm já mainâstem. Ton lasseen sämikielâlii media puáhtá pyevtittiđ jieš‑uv ovdâmerkkân čälimáin sosiaallii mediast, Harvala muštoot.
Biŋŋoluámáttâh kávnoo Laapi kirjerááju viermisiijđoin. Tom puáhtá meid viežžâđ Laapi kirjeráájuin kuittâg Säämist, Muoniost já Ruávinjaargâst. Biŋŋoruvdustuv lasseen luámáttâh siskeeld liiŋkâid sämikielâlij amnâstuvâi kavnâmân.
Háástun puáhtá uásálistiđ 31.12.2026 räi. Uásálistei koskân vuárbojeh Duodji Shop skeŋkkâkoortah.
Taat lii vuossâmuš tohe, ko Suomâ säämi eromâškirjerááju uárnee tággáár háástu nuoráid. Harvala mield sij áiguh orniđ lase luuhâmháástuid, jis vuástáväldim lii pyeri.
Kove: Čáittukove Yle Anarâš saavah- já Sápmi Säämi -siijđoin sehe Anarâš aavis siijđoin, Kovekieđâvuššâm: Valtteri Valkeapolku