Taažâ ruvnâprinses Mette-Maritân lii tohhum kepissirdem, já čuopâdâs lii luhostum pyereest, almoot Taažâ kunâgâsviste koskoho tiäđáttâsâstis. Mette-Marit čuopâdui Oslo ollâopâttâhlii pyecceiviäsust Rikshospitaletist, já taan räi prinses lii vaijaam pyereest.
52-ihásâš Mette-Marit puácá kepisfibroos, mii diagnosistui ive 2018. Koččâmušâst lii kroonisâš já ovdáneijee puácuvuotâ, mast kepiskođosân šaddeh udoh já pyeccee vuoiŋâmnahcâ hiäijun kuuloold. Prinses tiervâsvuotâ lii huánánâm merhâšitteht majemui mánuppojij ääigi, mondiet sun pieijui kepissirdemrááiđun kesimáánu aalgâst.
Mette-Marit piso pyecceiviäsust maŋgâ oho tálhudem heiviittem, vajoidittem já máhđulij komplikaatioi keežild.
Prinssâ Haakon heivit jieijâs pargo-ohjelm, vâi sun puáhtá pyerebeht leđe pelikyeimis toorjân taan tuoibâm ääigi.
Mette-Marit lii sárnum puácuvuođâstis almolávt majemui ivij. Sun lii meid kiävttám lasehaapi almolijn teivâdmijn. Tuáhtárij mield kepissirdemčuopâdâs šoodâi äigikyevdilin talle ko Mette-Marit puácuvuotâ ovdánij varâlii muudon. Kepissirdem lii majemuš tipšomvyehi talle ko pyeccee eellimvuárdámuš čuopâdâsttáá lii oovtâ teikâ enâmustáá kyevti ive kukkosâš.
Kunâgâsviste lii kijttám puoh torjust, maid tot lii finnim, já almoot, et čuávuvâš tiervâsvuotâtiäđáttâs adeluvvoo talle ko Mette-Marit piäsá meddâl pyecceiviäsust.
Käldeeh:
– Hennes Kongelige Høyhet Kronprinsesse Mette-Marit er lungetransplantert (www.kongehuset.no)
– The Crown Princess placed on the lung transplant waiting list (www.royalcourt.no)
Kove: Dusan Reljin / Taažâ kunâgâsviste