Cuáŋuimáánust mun čaallim aavisân tast, et Tave-Italiast lâi čääci nuhâmin já et äššitobdei mielâst tarbâšuuččii 50 arvepeivid, vâi pesâččij maasâd normaaltilán. Na, 50 arvepeivid iä lah puáttám, mut taan ohhoost lii kal arvam čuuvtij eenâb ko táválávt arva 50 peeivist. Motomij soojij lii arvam joba 500 mm, mii lii eenâb ko Anarist arva já muáttá koskâmiärálávt oovtâ ivveest. Puáđusin lii paamus tulve Emilia-Romagna kuávlu historjást.
Enâmustáá oorvij kuávlu maadânuorttâoosijn ađai Bologna, Forlì-Cesena, Rimini já Ravenna eennâmkuudijn, kost jyehi áinoo juuhâ já aajâ lii tulvâm. Maaŋgah kaavpugeh já siijdah láá čääsi vyelni. Loveh tuhátteh ulmuuh láá karttâm vyelgiđ jieijâs paaihijn, tastko tobbeen ij lah innig torvolâš orroođ.
Junájotolâh lii orostâm. Tuorâstuv ij lamaš máhđulâš moonnâđ Milanost Adriameerâ riidon Bologna já Rimini peht. Áinoo máhđulâšvuotâ lâi mađhâšiđ vistig Firenzen tâi Rooman já tobbeen Apenniinij paijeel Italia nuorttâriidon.
Tulve tovâttij vädisvuođâid meiddei autojotolâhân. Páihálij luodâi lasseen meiddei A14-moottormaađij lâi uásild čääsi vyelni, já várádâhkuávluin maaŋgah luodah lijjii kiddâ eennâmvierâmij keežild.
Tulveest láá taan räi jáámmám 13 olmožid. Ohtâ ruumâš kavnui merâriddoost Cesenaticost, suullân 20 kilomeetter keččin ton saajeest, kogo sun lâi lappum. Tulve lii meiddei tovâttâm ucemustáá muádi miljard euro vahâgijd.
Äššitobdeeh láá ton uáivilist, et suijân taan katastrofân lii šoŋŋâdâhnubástus. Ij lah kuássin ovdil keevvâm nuuvt, ete ličij lamaš tuššâdeijee tulve kuhes koškepaje maŋa.
Käldeeh:
– Dopo l’alluvione si lotta contro il fango: in alcune zone della Romagna mancano cibo e acqua (www.dire.it)
– Alluvione Emilia-Romagna: 14 morti (www.repubblica.it)
Kove: Hans (Pixabay)