Italia Milanost já Cortina d’Ampezzost uárnejuvvojeh tälviparalympialiih njuhčâmáánu 6.–15. peeivi. Taah kištoh láá historjá viiđâdlovádeh paralympialiih. Tääl tälviparalympialijn kištottâllojeh ohtsis 70 miitaalkištod kuuđâ šlaajâst: alppâčuoigâmist, čuoigâmist, pääččimčuoigâmist, jieŋâskiärust, muotâluávdástmist já rullástovlicurlingist. Siähálâsjuávhui rullástovlicurling lii vuosmuu tove fáárust paralympialijn.
Aainâs käävci enâmid – Čekki, Eestieennâm, Latvia, Liettua, Puola, Stuorrâ-Britannia, Suomâ já Ukraina – láá pááccám meddâl paralympialij lekkâmjuuhlijn tondiet ko Aalmugijkoskâsâš Paralympiakomitea adelij moonnâm čoovčâ ryeššiláid já vielgisryeššiláid kištottâlleid love uásálistiđ paralympialáid eennâmtubdâlduvâigijn. Milano–Cortina paralympialáid lii mieđettum kištottâllâmvuoigâdvuotâ kuuđâ ryeššilâžân já neelji vielgisryeššilâžân nuuvt kočodum vildáás koortâi peht. Taah koortah láá mieđettum tagaráid kištottâlleid, kiäh iä puátusijdis peeleest liččii olláám kištoid. Ruošâ já Vielgis-Ruošâ ovdâsteijeeh iä mudoi peessâm uásálistiđ karssâmkištoid, tastko aalmugijkoskâsiih šlajâlitoh láá toollâm jieijâs kištottâllâmkiäldu vyeimist.
Yle ij čáittám lekkâmseremonia, iäge Suomâ staatânjunošehkin lamaš tobbeen fáárust.
Milano–Cortinast láá fáárust nyevt 600 kištottâlled 56 enâmist.
Suomâ lii vuolgâttâm paralympialáid neelji kištottâllee juávhu
Suomâ lii vuolgâttâm kištoid nelji ulmuu:
Inkki Inola lii laukaalâš čyeigee, kote uásálist uáinimvádulij čuoigâmân. Suu šlaajâst uápisteijee čuáigá kištottâllee oovdâst já addel sánálijd ravvuid ovdâmerkkân oovdâst leijee muuhijn, miätáluvâin já kuárŋumijn. Inola uápisteijen lii Reetu Inkilä. Inolan taah paralympialiih láá jo kuálmádeh. Pyeongchangist 2018 sun lâi 20 kilomeetter čuoigâmist lovváád, 1,5 kilomeetter spriintist čiččâd, 10 kilomeetter ärbivuáválii čuoigâmist káávcád já 4 x 2,5 kilomeetter čuoigâmist lovváád. Pekingist sun uulij 20 kilomeetter čuoigâmist niäljádin. Spriintist sun lâi kulmânubálovváád já 12,5 kilomeetter rijjâ stiijlâ čuoigâmist kyehtnubálovváád.
Nette Kiviranta lii helsiglâš alppâčyeigee, kote uásálist puáibildmân já stuorrâpuáibildmân. Taah kištottâlleeh kevttih alppâčuoigâmkiälhá tondiet ko sist lii váddu, mii vaaigut vyeliruovjij já roopâ toimâmân. Kiviranta lii ovdil juksâm para-alppâčuoigâm puáibildmist MM‑siilbâ 2022, stuorrâpuáibildem MM‑proonsi 2023 já kole Universiadij stuorrâpuáibildmist 2025.
Kittâllâš Maiju Laurila uásálist puáibildmân. Sun lii ovdil juksâm 2022 Lillehammer MM‑kištoin niäljád saje já 2025 Meribel MM‑puáibildem 10. saje.
Espoolâš Matti Sairanen lii muotâluávdásteijee, kote uásálist juávkun, mast kištottâllein lii váddu jo-uv nube pajeryevjist teikâ kuohtuin pajeruovjijn. Siämmáánáál ko Inkki Inolast‑uv, meid sunjin taah paralympialiih láá jo kuálmádeh. Pyeongchangist já Pekingist sun lii olláám 20 pyeremuu juávkun. Sun lii neeljikiärdásâš MM‑mitalist parataekwondost ivij 2010–2014.
Käldeeh:
– Milano-Cortina 2026 (www.paraurheilu.fi)
– Milano–Cortina 2026 (paralympics.org.uk)
– Seitsemän maata boikotoi paralympialaisten avajaisia Venäjän vuoksi Suomen ohella (yle.fi)
– Suomi boikotoi – syynä venäläiset (www.is.fi)
Kove: MARTINOPHUC