Sámi Grand Prix uárnejui lávurduv njuhčâmáánu 28. peeivi Kuovdâkiäinust Báktehárji-maaŋgâtoimâhaalâst. Ton ohtâvuođâst juohhui ihásâš Áillohâš-palhâšume, mii mieđettui vuosmuu tove kuáhtásân: Mikkâl Morottajan ađai Amocân já Ailu Vallen.
– Puoh stuárráámus kunnee, mon sáátám uážžuđ sämisiärvusist, kommentistij Valle.
– Muoi halijdeen rähtiđ muusik, mii kuáská ulmui tobdoid já mast lii merhâšume ohtsâškoodán. Tuáivum, ete taat addel lase puorijd puátusijd, eeđâi Morottaja.
Áillohâš-palhâšume tuámmárkodde vuáđustij valjiimijd ráppájeijeekuáhtás kuhesáigásijn pargoin sämiräp já sämihiphop oovdedmist.
– Kuohtuuh lává puáhtám uáinusân kielâ, ohtsâškode, politiik já luándu tevstâinis. Návt suoi lává vijđedâm sämimuusik muusikšlaajân, moos kulá meid tááláš tihtâvuotâ, tuámmárkodde čáálá.
Tuámmárkode mield muusik já saanij vuovvijn vyeitteeh lává porgâm stuorrâ pargo, mon áánsust kielâi kevttimmáhđulâšvuođah láá šoddâm tobdosin já uđđâ suhâpuolvah láá šoddâm anneeđ kielâoppâm áárvust.
Áillohâš-palhâšume lii juohhum ive 1993 rääjist. Tot vuáđudui Áillohâš ađai Nils-Aslak Valkeapää 50‑ivváášjuuhlij mušton. Palhâšume adeluvvoo taidârân, kote lii ovdedâm sämimuusik já juoigâm. Vuosmuu tove palhâšume finnij Mari Boine.
Palhâšume árvu lii 40 000 Taažâ ruvnâd (suullân 3 500 eurod). Ton lasseen toos kuleh kyevti oho aassâm Áillohâš taidârvisteest Lásságámmist sehe Nils-Johan Labba tuoijum kukse já nijbe.
Ellinor Halvari já Ánte Niillas Bongo vuoittijn Sámi Grand Prix
Ellinor Halvari vuoitij Sámi Grand Prix lávlumuási pitáinis Du Dušši. Sun uásálistij kiišton nube tove. Vuosmuu tove ive 2022 Halvari já suu juávkku pottii nubben.
Ärbivuáválii juoigâm uási vuoitij Ánte Niillas Bongo juáigusáin Nášša Álddožiid.
– Kale taat lii eromâš vyeittiđ Sámi Grand Prix. Ärbivuáválâš juoigâm lii uáli mávsulâš munjin, já mun halijdâm, ete tot siäilu, iätá Bongo.
Sámi Grand Prix puáhtá keččâđ Yle Areena vuárhást.
Käldeeh:
– Sámi Grand Prix vuoitit leat čielgan ja Áillohaš-bálkkašupmi juhkojuvvon (yle.fi)
– Amoc ja Ailu Valle vuittiiga Áillohaš-bálkkašumi (www.nrk.no)
Kove: Mads Suhr Pettersen / Säämi pessijâšmarkkâneh