India lii algâttâm maailm stuárráámuu olmoošviehârekinistem cuáŋuimáánu vuosmuu peeivi. Toos láá uásálistmin paijeel kulmâ miljovn virgeolmožid. Taat rekinistem lii meid korrâ logistisâš hástu.
Ovdebâš rekinistem lii tohhum 15 ihheed tassaaš, nuuvt et olmoošviehâ Indiast ij lah rekinistum ive 2011 maŋa. Talle enâmist lijjii ohtsis 1,2 miljard olmožid.
Ive 2021 rekinistem ájánij koronapandemia keežild.
Olmoošviehârekinistem tahhoo kyevti periodist. Cuáŋuimáánust čohčâmáánun čuággojeh tiäđuh viistijn já palvâlusâin, já maŋeláá vuáijoo olmoošvievâ ráhtusân, tego ekonomisii sajattâhân, škovliittâsân já kastioornigân, mii miäruštâl maaŋgâi ulmui sosiaallii tile.
Kastitiäđuh iä almostittum majemuu rekinistmist toi epiloogisâšvuođâ já pooliitlij keldui keežild. Ovdebáá tove olmoošviehârekinistmist norrojii kastitiäđuh Britannia sirdoeennâmvääldi ääigi ive 1931.
Olmoošvievâ lasanem toovât eromâš stuorrâ háástuid stuorrâ kaavpugijn, main čääci, šleđgâ, purrâmuš já aassâmsaje láá vääniht. Stuorrâ kaavpugijn slummiaassâm siämmáánáál ko ááimu já čääsi nyeskidem láá argâpiäiváliih čuolmah. Uđđâ rekinistmij ulmen lii finniđ äigikyevdilijd tiäđuid, moh išedeh haldâttuv vuáváđ pehtilubbooht palvâlusâid já resursijd.
Käldee:
– Intia aloittaa maailman suurimman väestönlaskennan huomenna (yle.fi)
Kove: Gaurigrazia (Wikimedia Commons)