Vuossâmuš Wikimedia-konferens Ghanast sarnum aalmugkielâi aktivistáid uárnejui Tamalest Ghanast vyesimáánu 12.–14. peeivi 2023. Konferens ulmen lâi faallâđ aktivistáid máhđulâšvuođâ jyehiđ jieijâs feeriimijd tast, maht Wikipedia puáhtá išediđ aalmugkielâi iälááskitmist.
Konferens ääigi kieđâvuššojii el. Wikipedia haaldâšmân kyeskee ääših sehe teknisiih ääših tegu infrastruktuur huksim. Uásálisteeh savâstâllii meiddei tast, maggaar torjuu čälleeh tarbâšeh já maht puáhtá hokâttâllâđ lase čälleid já aktivistijd fáárun.
Fáárust lijjii suulân 60 aktivistid já oovce aalmugkiellâd: kusaalkielâ, ewekielâ, dagarekielâ, twikielâ, dagbanikielâ, ghanalâš pidginkielâ, gurunekielâ, fantekielâ já moorekielâ. Puoh taid kieláid lii huksejuumin Wikipedia. Dagbanikielâst lii jo olmâ Wikipedia, mii tääl siskeeld 6 755 artikkâlid. Stuárráámus uási tain láá kuittâg uáli jo uánihááh já siskeldeh tuše oovtâ celkkuu.
Ghana virgálâš kielâ lii eŋgâlâskielâ, mii tobbeen kiävttoo haldâttâs-, máttááttâs- já kavpâšemkiellân. Veikkâ stuárráámus uási ghanalijn sárnuh-uv eŋgâlâškielâ njyebžilávt, tot ij kuittâg lah sii eenikielâ. Eenikiellân ghanaliih sárnuh táválávt mottoom aalmugkielâ. Ghanast aalmugkielah láá suulân 70. Wikipedia lii eromâš tehálâš Ghana já meid ubâ Afrik aalmugkieláid, tastko tot pyereed kielâ sajattuv siärváduvâst já nanosmit kielâ luuhâm- já čäällimkulttuur.
Taat lâi vuossâmuš tohe, ko konferens uárnejui. Ulmen lii kuittâg orniđ teivâdmijd meiddei puátteevuođâst nuuvt ete Wikipedia-aktivismist šodâččij juátkojeijee toimâ ubâ Ghanast.
Käldee:
– Ghanaian Wikimedia languages meet ups begin in Tamale (www.myjoyonline.com)
Kove: Welcome to All ! ツ (Pixabay)