Siämmáá ääigi ko maailmist suvâttuveh maaŋgah ellee- já räsišlaajah, totkeeh kävnih ain uđđâ, tubdâmettum šlaajâid. Maaŋgah šlaajah suvâttuveh ovdil ko toh ubâ kávnojeh. Suhâjämimeh tábáhtuveh tääl jotelubbooht ulmui tooimâ keežild. Ohtân suijân lii meccihiävu, mon toovvât ovdâmerkkân eennâmviljâlem. Eellimpirrâseh láppojeh, já ellei lavâttes kavpâšem uhked meid maaŋgâid elleešlaajâid.
Tuáhtár Shannon Bennett, tieđâjođetteijee Kalifornia tieđâakatemiast, muštâl, ete totkeeh láá kavnâm taan ääigi maailm puoh ellee-, räsi- já kuobâršlaajâin vaarâ tuše 10 prosentid. Ovdil ive 2024 tiättojii 2,2 miljovn šlaaijâd. Ive 2024 kávnojii oppeet uđđâ šlaajah nuuvt Maadâ-Afrik čaasijn, Himalaja-váráduvâst ko Vietnam arvemeecijn-uv. Uási kavnum šlaajâin lijjii kuittâg jo fossiileh, tego pterosaur. Tot lii kirdee kašmârdeijee, mii eelij 168–166 miljovn ihheed tassaaš já kavnui Skye-nommâsii suollust Skotlandist. Maaŋgah kavnum uđđâ šlaajah láá uáli jo epitáváliih já tubdâmettumeh, mutâ toh pyehtih leđe kuittâg teháliih luándu ekosysteemáid.
Ive 2024 kávnojii eres lasseen trooppisii Saint Helena -nommâsii suollust Atlant väldimeerâst kyehti evnišlaajâ, moh lättejeh tego merâriäváreh. Toh väldideh eres eevnij evnijoddeid já sormejeh evnijoddei omâsteijeid. Ive 2024 kávnojii meid maaŋgâmuđusiih tiivreh, tego ijjâpiäivááloddááh. Ohtsis kávnojii 11 uđđâ tivrešlaaijâd. Ton lasseen Ruotâ Norrbottenist já Taažâ Finnmarkist sehe Eestienâmist kavnui uđđâ stuorrâsmiäruhšlaajâ, Russula lapponica. Taan kuobbâr eromâš jiešvyehhin lii tot, ete tast lii kyelihaajâ.
Alto Mayo kuávlust Peru maadânuorttâoosijn kavnui omâs kyeli, mon uáivi niävttá tego stuorrâ njune. Totkeeh iä vala tieđe, maht taat kyeli hiätá tággáár uáivihäämist. Alta Mayo kuávlust totkeeh kavnii ohtsis 27 uđđâ šlaaijâd. Xingujuuvâst Brasiliast kavnui kyeli, mii uážui noomâ ”Sauron” (läättinkielân Myloplus sauron) Tolkien kirje Suormâsij hiärrá mield, tastko ubâ kyeli niävttá tego stuorrâ čalme, mii lii Sauron-skeelmâ tubdâldâh. Taat kyeli lii mudoi-uv epitáválâš tondiet ko tot lii šaddoporree piraija. Ive 2024 Kalifornia tieđâakatemia totkeeh kavnii ohtsis 138 uđđâ šlaaijâd, main 32 láá kyeleh.
Stuorrâ Mekong kuávlust Aasia maadânuorttâoosijn kavnui ohtâ säggisäplig, mast láá kuhes čalameh. Tot uážui läättinkielâ noomâ Hylomus macarong. Sääni macarong puátá vietnamkielâ säänist Ma cà rông, mii meerhâs ”vampyyr”. Kuávlust lii riges já uáli maaŋgâhámásâš luándu.
Käldeeh:
– Tutkijat löysivät satoja uusia eläin- ja kasvilajeja viime vuonna (yle.fi)
– ‘Bizarre’ blob-headed fish and amphibious mouse among 27 new species found in Peru (edition.cnn.com)
– Pterosaur: Unique flying reptile soared above Isle of Skye (www.bbc.com)
– Scientists have identified an estimated 10% of all species on Earth. Here’s what they found in 2024 (edition.cnn.com)
– Vampire hedgehogs, pirate spiders and fishy fungi – the strangest new species of 2024 (www.bbc.com)
Kove: Boloria (Pixabay)