Merâriävváreevnih já šaddoporree piraijah – uđđâ ellee- já räsišlaajah kávnojeh ain

Siämmáá ääigi ko maailmist suvâttuveh maaŋgah ellee- já räsišlaajah, totkeeh kävnih ain uđđâ, tubdâmettum šlaajâid. Maaŋgah šlaajah suvâttuveh ovdil ko toh ubâ láá tubdum. Suhâjäämmim tábáhtuvá jotelubbooht ko maid totkeeh láá miäruštâllâm, joba 10–100 tohheed jotelubbooht. Suijân lii ulmui toimâm, mii tuššâd luándu. Ohtâ suujâin lii meccihiävu. Ovdâmerkkân eennâmviljâlem toovvât meccihiävu. Eellimpirrâseh láppojeh, já lavâttes elleekavpâšem uhked meid maaŋgâid elleešlaajâid.

Tuáhtár Shannon Bennett, tieđâjođetteijee Kalifornia tieđâakatemiast, muštâl, ete totkeeh láá kavnâm taan ääigi maailm puoh ellee-, räsi- já kuobâršlaajâin vaarâ tuše 10 prosentid. Ovdil ive 2024 tiättojii 2,2 miljovn šlaaijâd. Ive 2024 kávnojii oppeet uđđâ šlaajah nuuvt Maadâ-Afrik čaasijn, Himalaja-váráduvvâst ko Vietnam arvemeecijn-uv. Uási kavnum šlaajâin lijjii kuittâg jo fossiileh, tego pterosaur, kirdee kašmârdeijee, mii eelij 168–166 miljovn ihheed tassaaš já kavnui Skye suollust Skotlandist. Maaŋgah kavnum uđđâ šlaajah láá uáli epitáváliih já tubdâmettumeh, mutâ toh sättih leđe kuittâg teháliih luándu ekosysteemáid.

Ive 2024 kávnojii eres lasseen trooppisii St. Helena suollust Atlant väldimeerâst kyehti evnišlaajâ, moh lättejeh tego merâriäváreh. Toh väldideh eres eevnij evnijoddeid já sormejeh evnijoddei omâsteijeid. Ive 2024 kávnojii meid maaŋgâmuđusiih tiivreh, tego ijjâpiäivááloddááh, moh lijjii 11 uđđâ šlaaijâd. Ton lasseen Ruotâ Norrbottenist já Taažâ Finnmarkist sehe Eestienâmist kavnui uđđâ stuorrâsmiäruhšlaajâ, Russula lapponica. Taan kuobbâr eromâš jiešvyehhin lii tot, ete tast lii kyelihaajâ.

Alto Mayo kuávlust Peru maadânuorttâoosijn kavnui uáli epitáválii hámásâš kyeli, mon uáivi niävttá tego stuorrâ njune. Totkeeh iä vala tieđe, maht taat kyeli hiätá tággáár uáivihäämist. Alta Mayo kuávlust totkeeh kavnii ohtsis 27 uđđâ šlaaijâd. Xingu-juuvâst, Brasiliast, kavnui kyeli, mii uážui lijgenoomâ ”Sauron” (läättinkiellân Myloplus sauron), Tolkien kirje Suormâsij hiärrá mieldi, ko ubâ kyeli niävttá tego stuorrâ čalme, mii lii Sauron-skeelmâ tubdâldâh. Taat kyeli lii mudoi-uv epitáválâš, tastko tot lii šaddoporree piraija. Kalifornia tieđâakatemian lohtâseijee totkeeh valdâlii ohtsis 138 šlaaijâd, main 32 lijjii kyeleh.

Stuorrâ Mekong kuávlust Aasia maadânuorttâoosijn kavnui ohtâ uáli epitáválâš säggisäplig, mii uážui läättinkielâ noomâ Hylomus macarong. Sääni macarong puátá vietnamkielâ säänist Ma cà rông, mii meerhâs ”vampyyr”, ko taan säggisäplig láá kuhes čalameh. Kuávlust lii riges já uáli maaŋgâhámásâš luándu.

Käldeeh:

– Tutkijat löysivät satoja uusia eläin- ja kasvilajeja viime vuonna (yle.fi)

– ‘Bizarre’ blob-headed fish and amphibious mouse among 27 new species found in Peru (edition.cnn.com)

– Pterosaur: Unique flying reptile soared above Isle of Skye (www.bbc.com)

– Scientists have identified an estimated 10% of all species on Earth. Here’s what they found in 2024 (edition.cnn.com)

– Vampire hedgehogs, pirate spiders and fishy fungi – the strangest new species of 2024 (www.bbc.com)

Kove: Boloria (Pixabay)

Kommenteh

Čääli komment

Kirjoita kommenttisi!
Kirjoita nimesi tähän

Luuvâ meid

Uđđâsumos uđđâseh

Argentiina kuáđá Maailm tiervâsvuotâornijdume WHO

Argentiina president Javier Milei almottij kuovâmáánu 5. peeivi, ete Argentiina áigu kyeđđiđ Maailm tiervâsvuotâornijdume WHO. Almottâs poođij kyehti oho ton maŋa ko Ovtâstum staatâi...

Kirjeárvuštâllâm: Ij lah ko vyelgiđ

Ij lah ko vyelgiđ lii nuorâikirje, mon lii čáállám Ann-Helén Laestadius. Tot lii algâalgâlávt čallum ruotâkielân. Uáivipersovn lii 19-ihásâš Johannes. Sun ij tieđe, maid sun...

Säämimuseo Siida puávdee siärvus mieldi valjiđ tiiŋgâid vuáđučáitáldâhân

Säämimuseo Siida puávdee sämisiärvus mieldi valjiđ tiiŋgâid vuáđučáitáldâhân. Museo väljee sämmilâštiiŋgâid Siida vuáđučáitálduv siärvusvitriinân oovtâst siärvusáin. Taan tove uáinusân peesih Tave-Pohjanmaa museo skeŋkkim sämitiiŋgah,...

Yle Sáámán usâškyeteh uđđâ hoovdâ – Maiju Saijets lii ciälkkám jieijâs luovâs pargostis

Yle Sáámán usâškyeteh forgâpalij uđđâ hoovdâ. Yle Säämi tááláš hovdâ Maiju Saijets lii ciälkkám jieijâs luovâs pargostis cuáŋuimáánu rääjist. Sun lii lamaš uáppuluámust vyesimáánu...

Totkee čoovdij matemaatlii čuolmâ, mii lâi čuávdusttáá paijeel 40 ihheed

Totkee Susanna Heikkilä lii jieijâs náguskirjetutkâmušâst Helsig ollâopâttuvâst čuávdám matemaatlii čuolmâ, mii lâi čuávdusttáá paijeel 40 ihheed. Čuolmâ kuáská topologian. Topologia lii geometrisâš syergi,...