Orgaanluovâttemalmottâsâi meeri lii lasanâm merhâšitteht Taažâst ton maŋa ko ruvnâprinses Mette-Marit tiervâsvuotâtiileest muštâlui almolávt. Taažâ kunâgâshovi já Oslo kuávdášpyecceiviäsu láá almottâm, et ruvnâprinses lii pieijum kiäppásirdemrááiđun. Mette-Marit puácá kepisfibroos, mii lii jiegâ äštee puácuvuotâ.
Kiäppásirdem tahhoo táválávt tagaráid pyecceid, kiäi eellimahevuárdámuš ličij čuopâdâsttáá vuálá kyehti ive.
Taažâ eellimluovâttemregister mield orgaanluovâttemalmottâsâi meeri lii táválávt 70 almottâssâd peeivist, mut ruvnâprinses tile almottem keežild toi meeri pajanij moonnâm vástuppeeivi paifakkist 2 178 (kyevttuhháát čyetičiččâmlovkäävci) almottâssân. Tuorâstuv almottâsah pottii 312, mii tot-uv lâi čuuvtij eenâb ko táválávt.
– Taah láá aaibâs jolâs lovoh, maid mij ep lah kuássin ovdil uáinám. Tile lii eidu siämmáálágán ko juovlâmáánust ko muštâlui, et sun taarbâš kiäppásirdem, muštâl Taažâ orgaanluovâttemsiättus tieđettemhovdâ Aleksander Sekowski.
Äššitobdei mield pegâlmâs ulmui puáccáámist sáttá leđe merhâšittee vaiguttâs toos, maht ulmuuh uáinih orgaanijdis luovâttem já jieijâs táátun kyeskee äššikirjij hammim.
VG-loostâ mield Taažâ parga ohtsâšpargo eres Tave-enâmijgijn orgaanij luovâttem kuáttá. Jis orgaan ij kavnuu jieijâs enâmist, te taggaar máhđulávt kávnoo olgoenâmijn. Kepistavdâi njunoštuáhtár Are Holm Oslo ollâopâttâhlii pyecceiviäsust Rikshospitaletist muštâl median, et Taažâst maaŋgah sirduumân uáivildum orgaaneh puátih nube Tave-enâmist. Sun muštâlij, et Tave-enâmeh pargeh ohtsâšpargo Scandiatransplant-organisaatioin, mon jesânin láá puoh Tave-enâmeh já meid Eestieennâm. VG finnim tiäđui mield Taažân puáhtojii tijmá olgoenâmijn 20 manemuššâd, kulmâ vááimu, oovce vuoivâsid já nelji kiäppá. Puoh kiäppáh puáhtojii Ruotâst.
Are Holm muštâl, et orgaan sirdemist kalga väldiđ huámášumán maaŋgâid aašijd. Vistig-uv vorrâtijppâ kalga leđe rievtislágán. Ton lasseen kalga visásmittiđ, et vuástáväldest iä lah vyestiamnâseh luovâtteijee kođostiijpâ vuástá. Holm muštâl meid, et orgaanij luovâtteijee anonymiteet visásmittoo, adai tiäđuh orgaan luovâtteijee uámikkâsâst iä meidgin adeluu vuástáväldei ige suu perrui.
Uđđâ orgaan vuástáväldee ferttee puurrâđ loppâelimis talkkâsijd, moh estih vieres orgaan hilgomreaktio. Taat vist vyeleed tavdâi vuástálistemnaavcâid. Jis čuopâdâs luhostuvá, te uđđâ orgaan juátká Tave-enâmijn ulmuu eellimave táválávt 10–15 ihheed.
Käldeeh:
– Mette-Marits leger møtte pressen: – Dette er farlig (www.vg.no)
– Vakavasti sairas Mette-Marit asetettiin elinsiirtojonoon – sitten Norjassa alkoi tapahtua: ”Hulluja lukuja” (www.is.fi)
Kove: Snowflake2235 (Wikimedia Commons)