Ruátálâš Boliden lii meridâm lopâttiđ Kevitsa ruuvki Suáđi­kylást

Ruvkkifinnodâh Boliden lii meridâm macâttiđ Kevitsa ruuvki miljardluoka investistem já lopâttiđ Suáđikylá ruuvki ive 2034. Taat miärádâs lii pozettâm vuáimálijd reaktioid Suáđikylást. Páiháliih ulmuuh láá huolâst jieijâs pargosojij siäilumist já kieldâ puátteevuođâst. Meiddei miärádâs tuođâlijn suujâin savâstâlloo.

Boliden almottij vyesimáánu loopâst, et tot ciälkká luovâs 77 parged. Ton lasseen paijeel čyeđe ulmuu pargokován já pargoiävttoid puátih nubástusah. Finnoduv mield nyevt miljard euro investistem ličij lamaš velttidmettum ruvkkitooimâ juátkimân ive 2034 maŋa.

Suáđikylá kieldâhovdâ Jari Rantapelkonen ana miärádâs unohis äššin kieldân. Kevitsa lii kuávlu stuorrâ pargoadeleijee, já pargei kepidem keeppid meid kieldâ viärupuáđuid.

Páihálij ulmui kooskâst uáinuh ruvkkitooimâ joskâmist juáhášuveh. Motomeh aneh haldâttuv čovgim ruvkkiviäruttâs suijân investistem maacâtmân. Boliden jieš lii nomâttâm suijân viäruttâs čovgim, toorjânubástusâid já investistem hiäjunâm kannattetteevuođâ. Finnodâh almottij jo njuhčâmáánust, et neeljikiärdásâžžân pajanâm ruvkkiviäru uhkedij Kevitsa puátteevuođâ investistemvuáváámijd.

Suomâ luándusuojâlemlito Laapi pirrâduv mield Kevitsa vijđedem orostij merhâšittee pirâshástoid. Ton mield tááláá tooimâ juátkim viijđedmijttáá ličij pyereeb muulsâiähtu, tastko toimâ nuvâččij tolebiššáá já vaiguttâsah Natura-kuávloid pásáččii ucebin. Boliden mield pirâssuujah iä lah lamaš tot äšši, mii ličij vaiguttâm ruuvki kiddiimân, pic miärádâs tohhui ekonomisij sujâi keežild. Siämmást finnodâh lii áigumin juátkiđ malmâuuccâm Suáđikylá kuávlust meid puátteevuođâst.

Veik Kevitsa ruvkkitooimâ nuhâmân láá vala käävci ihheed, te miärádâs meerhâš tääl jo Suáđikylán eromâš stuorrâ epivisesvuođâ aaigijd. Kevitsa ruvkki lii faallâm pargo nyevt 500 ulmui, já tot lii lamaš ohtâ kieldâ merhâšitteemuin ekonomisijn keđgijuolgijn. Kieldâ puátteevuođâ uáinuh vuáđuduveh tääl ain eenâb maađhâšmân, piäluštâsvuoimij tooimân já máhđuláid uđđâ investistmáid kuávlust.

Käldeeh:
– Luonnon­suojeluliitto: Kevitsan kaivos kaatui ympäristö­haittoihin – Yhtiön mukaan Natura-arvio ei vaikuttanut sulkemiseen (yle.fi)
– ”Eihän tämä ole mistään kotoisin” – Boliden sulkee Kevitsan kaivoksen Sodankylässä, näin kunnassa kommentoidaan (yle.fi)
– Ke­vit­san työn­te­ki­jät saivat tiedon kai­vok­sen lop­pu­mi­ses­ta Kaup­pa­leh­des­tä – ”Osalla on usko mennyt yh­tiöön” (www.kaleva.fi)

_{Kove: Boliden}