Suomâst statistisávt merkkejum kulâttem vuáđuld alkohol kevttim lii ain kiäppánâm, muštâl Tiervâsvuođâ já pyereestvaijeem lágádâs THL. Ive 2025 statistisávt merkkejum kulâttem lâi koskâmiärálávt suullân 6,9 litter čyetiprooseentlâš alkohol jyehi 15 ihheed tiävdám ässee kuáttá. Taat lii 4,5 prooseent ucceeb ko ive 2024. Statistisávt merkkejum kuulâtmân kuleh pođoskulâttem (ei. käävpih já Alko) já juvâstâhvyebdimkulâttem (ei. raavâdviäsuh).
Alkohol statistisávt merkkejum kulâttem ubâ Suomâst lâi ive 2025 suullân 33,3 miljovn litterid čyetiprooseentlâš alkohol. Ko verdid ihán 2024, te pođoskulâttem kiäppánij 4,3 prosentáin já juvâstâhvyebdimkulâttem kiäppánij 4,5 prosentáin. Alkohol vuobdui ucceeb puoh pyereestvaijeemkuávluin. Enâmustáá vyebdim kiäppánij Varsinais-Suomâst. Jieškote-uvlágánijn juhâmâšjuávhuin tuše kievrâs vuolâ kulâttem lasanij. Puoh eres juávhui kulâttem kiäppánij ivveest 2024.
Alkohol statistisávt merkkejum kulâttem lii kiäppánâm Suomâst ive 2011 rääjist, kuás tot lâi 9,8 litterid čyetiprooseentlâš alkohol jyehi 15 ihheed tiävdám ässee kuáttá. Aavis muštâlij alkohol kulâttem kiäppánmist meiddei ive 2024.
Oleskuulâtmist ij pyevti rähtiđ áárvu ihán 2025
Statistisávt merkkejum kulâttem lasseen alkohol oleskuulâtmân kulá statistiikán merkkiihánnáás kulâttem. Ive 2025 oleskuulâtmist ij pyevti rähtiđ áárvu, tastko merkkiihánnáás kulâttem tiäđunuurrâmvyehi lii ereslágán ko ovdil. Suáittoin porgum sahhiittâllâm muttui ive 2025 aalgâst internetpanelin, iäge sierâlágánijn vuovvijn nurrum tiäđuid pyevti lyetittetteht viärdádâllâđ.
Statistiikán merkkiihánnáás kuulâtmân kuleh alkohol uástim olgoeennâmlijn nettikaavpijn já mađhâšeijei enâmân pyehtim alkohol. Majemui iivij merkkiihánnáás kulâttem uási oleskuulâtmist lii lamaš suullân 15 prosentid.
Käldee:
– Alkoholijuomien anniskelu- ja vähittäiskulutus Suomessa väheni vuonna 2025 – kokonaiskulutuksesta ei arviota menetelmämuutoksen vuoksi (thl.fi)
Kove: Valtteri Valkeapolku