Suomâ elleisuojâlemseervi SEY almostittem oppâmateriaaleh aldaluándu ellein láá almostum tääl meid anarâškielân. Oppâmateriaaleh láá vuávájum eromâšávt arâšoddâdmân já vyeliškoovlâi máttááttâsân, já taid puáhtá kevttiđ škoovlâ lasseen ovdâmerkkân pääihist já kerhoin.
Raavâkirjeh láá kyehti: Mii usteveh luándust ‑raavâkirje lii uáivildum vyeliškovlâahasáid, ko vist Elleeh tuu alda ‑raavâkirje suápá arâšoddâdmân. SEY mield materiaaleh išedeh párnáid smiettâđ, magareh aldaluándu elleeh láá, iberdiđ toi táárbuid já pyereestvaijeem merhâšume sehe suogârdiđ, maht kohtâliđ elleid pyereest. Oppâmateriaalin lii meid tiilámnáál Luándu lii mii päikki ‑poster, moin puáhtá uápásmuđ luánduelleid jieškote-uvlágánijn iveaaigijn.
Oppâmateriaaleh almostuvvii suomâ- já ruotâkielân Suomâ elleisuojâlemseervi ornim Ellei oho ohtâvuođâst ive 2024. Anarâškielân taid lii jurgâlâm Jasmina Schreck.
SEY viestâdemhovdâ Maria Eiskop muštâl, et ohtâ tehálumosijn aašijn, maid páárnáš uáppá mäđhistis vuoigâlii já demokraatlii siärvus jesânin, lii leđe empaatlâš já perustiđ iärásijn. Suu mielâst lii fiijnâ äšši, et Suomâ elleisuojâlemservi puáhtá faallâđ ellei pyereestvajemist muštâleijee oppâmateriaal meid eres kieláid.
Puoh SEY almostittem materiaalijd puáhtá tiiláđ nuuvtá pävirhäämist olssis pááikán tâi luoddiđ jieijâs tiätumašinân SEY nettisiijđoin.
Käldee:
− Suositut luontoaiheiset Eläinten viikon oppaat ovat saatavilla nyt myös inarinsaameksi (sey.fi)
Kove: SEY Suomen eläinsuojelu (koveh ovtâstittám Jasmina Schreck)